Buyer Seller Meet buatsaih a ni
Agricultural and Processed Food Products Export Development Authority (APEDA) leh Commerce & Industries department chuan nimin khan Aijal Club-ah 'Export Promotion Conference-cum-Buyer Seller Meet' an buatsaih a, Agriculture minister C Lalrinsanga'n a hmanpui.
Export Promotion Conference-cum-Buyer Seller Meet-ah hian Mizoram chhung hmun hrang hrang aṭangin kut hnathawktu te, entrepreneur leh India ram hmun hrang hrang aṭangin company 14 aiawh an tel a ni.
Agriculture Minister chuan, Covid-19 avangin agriculture leh a kaihhnawihte bakah, micro, small and medium enterprise (MSME)-te'n nasa takin harsatna an tâwk tih a sawi a, "Thil lawmawm deuh lo lang erawh chu, kan ṭhalaite zingah primary sector leh entrepreneurship lama harh tharna thleng nia lang hi a ni. Mizoram sorkar pawhin tuipuiin, hetiang lama tuite chu theihtawpa dâwm a tum a ni," a ti.
C Lalrinsanga chuan, Covid-19 kian hunah a tak taka hna thawh thuai theih hun a nghahhlehawm thu sawiin, "Loneitute thawh chhuah a lêta tihpun tumin Agriculture department chuan theihtawp a chhuah a ni," a ti a; district hrang hrangah KVK kaltlangin OP-12 bio-fertilizer unit, bio-control laboratory leh seed bank buatsaih mek a nih thu a sawi.
APEDA adviser Dr BS Negi pawhin thu sawiin, "APEDA hian loneitute leh kut hnathawktute hmasawnna a ngaihtuah ber a nih angin Export Promotion Conference-cum-Buyer Seller Meet hi India ram hmun hrang hrangah kan buatsaih ṭhin. Meet-in a tum ber chu Mizo kut hnathawktute thei leh thlai tharte state dang leh ram páwn thlenga thawn chhuah theih dan ngaihtuah a ni," a ti.