February, 2021 chhungin Covid-19 vei 51 hmu chhuak

Kumin February thla chhung khan Mizoramah Covid-19 vei mi 51 hmuh chhuah an ni a, an zinga 43 chu tualchhunga kái chhawng an ni. Thla liam ta vêk khan hripui laka fihlim tawh mi 62 chhuahtir an ni thung a; hmuh belh aiin chhuahtir mi 11-in an tam zawk.

February thla chhunga Covid-19 positive hmuh belh tam ber ní chu February 18 leh 25 niin, mi paruk ve ve hmuh chhuah an ni a; chutih laiin, hripui vei hmuh belh awm loh ni ṭum ruk (ni 3, 13, 14, 21, 24 leh 28) a awm bawk.

IDSP tarlan danin, February thla chhunga hripui vei hmuh chhuah mi 51 zinga mi 43 chu Mizoram chhunga kai chhâwng an ni a, mi pariat chu state páwn aṭanga rawn lut an ni. Tualchhunga hripui kái mi 43 zinga a tam zawk chu hri an kàina hriat theih a ni lo.

February 2021 chhung vêk khan hripui laka fihlîm tawh mi 62 chhuahtir an ni a; chhuahtir tam ber ni - February 4, 6, 9 leh 28-ahte mi panga ṭheuh chhuahtir an nih laiin, February ni 7, 13, 21 leh 23-ahte chhuahtir an awm lo thung.

Kumin February thlaah vêk khan Covid-19 vanga enkawl lai mi pakhat a thi. T Pazawna (82), Ramhlun North chu February 15 zing khan SRH-ZMC-ah a thi a; a thih hmaa swab sample endikah negative tawh mah se Covid-19 vei thia chhiar a ni.