Kawlphetha hman manah mipui phurrit thlen lo turin ZPM-in ngen

ZPM party chuan, Mizoram sorkara Power & Electricity department-in kawlphetha hman man (tariff) an ruahman thar chu mipui tan phurrit leh harsatna siamtu tura an ngaih avangin, mipui harsatna chhâwk zângkhai zawnga ruahmanna siam leh tura ngenna Joint Electricity Regulation Commission (JERC)-ah nimin khan an thehlut.

ZPM chuan, power tariff chu mipui harsatna chhâwk zângkhai zawnga ruahmanna siam tura ngenna JERC Secretary-a an thlen chu JERC Secretary aiawhin assistant secretary Richard Zothankima'n a lo dawng a ni.

Lehkha thehluttu ZPM secretary general PC Vanlalruata chuan, "Power & Electricity department-in tariff proposal a siam hi ngun taka kan zir hnuah, hetiang zata power chhit man tihsan tumna a awm hi ṭha kan ti lo a, mipui harsatna sukiang zawnga hma la turin ngenna kan thlen a ni," a ti.

PC Vanlalruata hi ZPM hruaitu dang Lalmuanpuia Punte, Phairo­thanga leh Eddy Zosangliana Colney ten an ṭawiawm a ni.

1.    Covid-19 (hripui) avanga Zoram mipui sum leh paiah harsatna nasa tak kan tawh laia domestic (LT) 75% laia a pung tur hi ṭha kan ti lo.

2.    Power sem darhnaa energy kal ral (distribution loss) 18% mipui min rulhtir tumna hi ṭha lo hlein kan hria.

3.    Power leina san belh si loa mipui tawrhtir hi ṭha kan ti lo.