Two wheeler taxi-te'n dinna an inchan lo Dinna chang lote pawisa chàwitir ṭhin an ni

Mizoram sorkar chuan tun hnaiah Aizawla tlân tur two wheeler taxi permit ṭhahnem tak a pe chhuak a, tun hnaia ṭhahnem tak a pek chhuah hnuah February 18, 2021 thleng khan permit 1,709 a pe chhuak tawh.

Hetih lai hian, Aizawla two wheeler taxi-te chuan dinna hmun an inchan lo a, dinna chang lote chu traffic police-te'n pawisa an chàwitir ṭhin. Two wheeler taxi a pun zel avangin an eizawnna chu innghahna tlâk loah a chhuah mai an hlauthâwng bawk.

Vanglaini palaiin Aizawl khawpuia two wheeler taxi dinna hmun hrang hrang zinga pakua - Chanmari, Zarkawt, Dawrpui, Treasury Square, Assembly House bul, Sikulpuikawn, Mission Veng Bazar leh Kulikawna two wheeler taxi stand-a dingte a kawmnaah, taxi stand an inchan loh nasat thu an lo hrilh.

Two wheeler taxi khalhtute chuan, "Sorkar hian permit a pek chhuah hma khan kan dinna tur stand hi ruahman belh se chuan, tun anga harsatna hi kan tâwk lo ang," an ti a; stand-a leng lote chuan stand sírah dinna tur âwl a awm hun an nghak ṭhin a, traffic police-te'n manin pawisa an chawitir fo tih an sawi.

Covid-19 hripui lên hma chuan two wheeler taxi chu eizawnna atan a hlâwk pangngai hle tih sawiin driver-te chuan, "Vanneih ní phei chuan Rs. 2,000 vel tlân chhuah ṭumte kan nei ṭhin a, vanneih vak loh ní-ah pawh Rs. 1,000 chu kan hmu deuh zel," an ti.

Covid-19 boruak avanga an tlân mumal loh hnuah sorkarin permit eng emaw zat a pe thar leh chuan an inṭàm chhuahna a thlen an hlauhthawn thu sawiin, "A hmaa awm sa lêt li dáwn permit pek thar a awm. Tunah permit nei thar zinga hmun thuma ṭhena hmun khat vel an rawn service tawh a, kan tlân kual fé pawhin ni khatah Rs. 800-1,000 vel kan hmu thei ṭâwk tawh," an ti a; permit pek thar zawng zawng an tlan vek chuan eizawnna eizawnna tlak lohah a chhuah mai an hlauh thu an sawi.

Two wheeler taxi khalhtute chuan, Aizawl khawpuia tlangdung (main road) ni lo, kawngpui pènhlehah chuan tlànna tur an neih mumal loh ṭhin avangin main road-ah an inhnawh khawm loh theih loh thu an sawi.

"Khawpui sír deuhah chuan stand chu kan nei ve tho a, mahse, four wheeler taxi-ah pawisa inthawh ṭâwmin tláwm zawka passenger-te an kal theih avangin keini chuan phurh tur kan hmu ve mang lo ṭhin," an ti.

Aizawl khawpuia two wheeler taxi tan hmun 15-ah stand a awm mek a, permit pek tharte zinga tam tak an tlân ṭan tawh avangin stand-ah an leng lo nasa hle. "Kan stand-ah hian ṭum khatah pali/panga vel bâk din phal a ni lo a, stand-a leng lote'n kan din hun kan nghak ṭhup ṭhin," an ti a; mumal takin din hmasak dan indawtin stand aṭanga an tlân ṭhin avangin harsatna an tawh thu an sawi.

Lirthei veivâk tamna hmunah stand-a leng lote chu traffic police-in an man fo thu sawiin, "Duty zingah mi hriatthiamna nei fel tak tak an awm rualin, stand-a leng lo kan tam avangin min man a, pawisa min chawitir ṭhin eng emaw zat an awm," an ti a; traffic duty-te'n stand-a leng lote an man fo avangin passenger nei lo pawhin tlân kual reng a ngaih cháng a awm thu an sawi a ni.

Two wheeler taxi service zinga mahni ta ni lo, mi taxi khalhtute chuan, two wheeler taxi thar a awm belh zel avangin an tan eizawnna tur khawp a tlin loh thuai an rin thu an sawi a, "Tunah hian a neitute'n ni khatah Rs. 500-600 an hauh tlangpui a, petrol leina bakah, ei leh in zawng zawng nen chuan ni khatah labour hlawh pawh phâk loh cháng kan nei ṭan a, chhungkaw châwm nan a hman tlak loh lek lek tawh a ni," an ti.

Two wheeler taxi chu pung mah se, a hmangtu an pun ve hluai loh avangin taxi rate chu sorkarin ennawnsak se an duh thu an sawi a, "Ṭhalaite eizawn nan tiin permit pek belh zel tumnate a awm niin kan hria a, hetianga eizawnna tura sorkarin min tihsak dawn a nih chuan kan rate hi min ennawnsakin tihpun deuh theih ni se," an ti a; an tlàn theihna pawh Aizawl chhungah chauh ni lo, Aizawl páwnah pawh phal tawh ni se an duh thu leh, an intlàn chhâwk dan chu ennawn theih ni se an duh thu an sawi.

Tuna two wheeler taxi rate hman mek chu, tlàn ṭanna aṭanga km. khatah Rs. 20 a ni a, km. khat aia thuiah chuan km. khatah Rs. 10 zelin a pung a ni.

February 24, 2021-a Assembly session-ah Transport minister TJ Lalnuntluanga chuan, Mizoram sorkarin Aizawl khawpuia service tur two wheeler taxi permit 2,400 pek chhuah a nih tawh thu a sawi.

Two wheeler taxi permit neite chuan an tlân hmain Aizawl Traffic police aṭangin sticker (A, B, C, D leh E) an lâk chhuah phawt a ngai. Tun hnaia permit pek chhuah thar zinga mi 500 chuan traffic police aṭangin sticker an la chhuak tawh a, a hmaa lo service tawh sa 496 nen, February 26, 2021 thleng khan Aizawlah two wheeler taxi tlan tura sticker la mi 996 an awm tawh a ni. Tlân tak tak tura Aizawl Traffic police hnena tihfel ngai la tifel lo 1,400 vel an la awm bawk.