Electoral Roll thar peih a ni Mizoramah voter 7,84,405 an awm
Mizoram electoral roll thar chu nimin khan district headquarters hrang hrangah tlangzarh a ni a; Mizoram electoral roll tharah hian voter 7,84,405 an awm a, electoral roll hnuhnung ber aiin voter 4032 in an tam zawk a ni.
Electoral roll tharah hian January 1, 2019-a kum 18 tling chinte thun an ni a, roll thar hi kumin Lok Sabha MP inthlana hman tur a ni. Vote nei mi 7,84,405 zinga 4,02,408 chu hmeichhia niin, 3,81,991 chu mipa an ni a, mipa aiin hmeichhia 20,417 in an tam zawk. Electoral roll tharah hian nihna thlak thleng (transgender) paruk an awm.
Nimin vek khan electoral roll tlangzarh chungchangah hian chief electoral officer (CEO) Ashish Kundra chuan State Media Centre, Secretariat Annex-I thuthar thehdarhtute kawmin, electoral roll tlangzarh tak chungchang a hrilhfiah.
Ashish Kundra chuan kum 18 tling tawh chinte electoral roll-a thun an nih ngei theihna atan March 1-2, 2018 hian special camp buatsaih an nih dawn thu sawiin, "A duh apiang tan polling station tinah electoral roll-a thun luh an nih leh nih loh en theih a ni ang," a ti. Electoral roll hi tlangzarh ni tawh mah se, electoral roll-ah hian inthunluh theih reng a la nih thu a sawi.
March thla chhung vek hian a bik takin higher section-a zirlaite tan special camp buatsaih a ni dawn tih sawiin CEO chuan, "Electoral roll-a la thun loh an awm chuan thun an nih theihna atan leh vote thlak ngei tura inzirtirna atan camp hi buatsaih a ni ang," a ti.
Vanglaini palai zawhna chhangin CEO chuan Tripura refugee camp-a Bru-te'n electoral roll-a inthunluh an dilna a tlai avangin tun ṭum roll tlangzarh takah hian thun thar an awm lo tih sawiin, "ERO-te'n dilna an enfiah ang a, continuous updation-ah thunluh theih an ni," a ti.