MNF kan khing dawn - MPCC President

Mizoram Pradesh Congress Committee (MPCC) president Lal Thanhawla chuan nimin khan Congress Bhavan-ah thu sawiin, "MNF-te high court-ah kan khing dawn," a ti.

Lal Thanhawla chuan Congress sorkar apiangin MNF-te'n high court-ah an khin ṭhin thu sawiin, "A hlawk a ni maithei ṭum 5 kan sorkar tawhah min la khing ziah a, an la hlawhtling lo. Court-ah khing ve chhin teh ang kan ti deuh, mithiamte kan rawn mek a, kan tih dan chu a dang deuh ang," a ti a, MNF hruaitute eiruk thubuaiah chargesheet an lakkhawm mek thu a sawi.

Hmarchhaka political party tam tak chu BJP-in CAB kaltlangpui zel an tum avangin NEDA aṭangin an inhnuhdawh thu sawiin MPCC President chuan, "MNF-te tinge an inhnuhdawh ve ngam loh kan tih chuan, engvangin nge an ngam ang? Inthlan neih zawh takah pawisa hmangin BJP-in an hnung khirh tlat a, sum leh paia inhnungkhirh hi a nghet viau a nih a rinawm," a ti.

Lal Thanhawla chuan central-ah BJP an tla­hniam chak hle tih sawiin, "Mizoramah pawh inthlanpui lo awm turah hian Congress kan dinhmun a ṭha hle a, indawmkum tur kan ni lo," a ti a, ZPM-te chu inthlan hnuhnung ber angin kohhran ho an unit an nih tawh dawn loh avangin beih an harsat tawh loh tur thu a sawi.