Routine exercise anga awm kan ni - AR

Mizoram chhim lam Va­ṭhuam­puia Assam Rifles awmte chuan Mizoram chhim lam ramria an awm chhan chu tih dan ṭhin kalphung pangngai (rou­tine exercise) a nih thu anmahni kawmtu Vanglaini palai an hrilh. Mizoram chhim lam ramriah hian Manipur aṭangin 29 Assam Rifles-te chu February 12 vel aṭang khan an awm ṭan a ni. 

Vanglaini palai chuan nimin khan Vaṭhuampui khua hi tlawh­in, thil awm dan a enfiah a ni. Zawh­na chhangin 29 Assam Rifles-a Assitant Commandant chuan routine exercise anga joint excer­cise tia awm an nih thu a sawi.

Vaṭhuampui khawtlang hruai­tute chuan Assam Rifle-te hian free clinic tiin February 20 khan an kohkhawm thu sawiin, "Awm dan tur min hrilh a, ramhnuaia kal lo turin min ti a ni. Vawiin aṭang khan ramhnuaia kal an phal a, ramhnuai pilril laia kal erawh an phal lo," an ti. 

Ralmuan lohna em em a awm loh rualin ram­buai ni si loa sipaiin an chen­chilh avangin nunau ṭhenkhat chuan an hlauthawn thu Vanglaini hrilhin Vaṭhuam­pui YMA President chuan, "Chhunzan zawmin an duty a, ralṭi lutuk lo turin min hrilh," a ti a, sipaite chet­dan phung chu chhun leh zan­ah a danglam loh thu a sawi. 

Vaṭhuampui khawtlang hruaitute chuan Myanmar Army leh Arakan Army-te inkah ri an hriat hnuhnun ber chu December, 2018 vel a nih thu an sawi a, "Kuminah chuan silai ri kan la hre lo," an ti. 

Hetihlai hian sipaite chuan Vaṭhuampui panna kawnga kawng peng ṭhuam awmna hmun hnih Bungtlang South daiah leh Saibawh daiah checkgate an siam a, lirthei lut chhuakte chu endikin, lirthei number leh a chuang zatte an chhinchhiah a ni.