AR-te warrant of arrest dan rih a ni

Sorkar laipui chuan Assam Rifles sipaite hnena hmarchhak state panga - Assam, Arunachal Pradesh, Manipur, Mizoram leh Nagaland-a warrant tel loa mi man leh dap theihna tur thuneihna a pek chu nimin khan a dang leh hrih.

 

February 19 khan Ministry of Home Affairs (MHA)  chuan thupek tichhuakin, hmarchhak state panga-a border district-ah Assam Rifle sipaite chu  CrPC section 41 hnuai subsection (1), section  47, 48, 49, 51, 53, 54, 149, 150, 151 leh 152 hnuaiah warrant nei loa mi man leh dap theihna  pek an nih thu a tarlang a ni.  

Mahse hriattirna a tihchhuah aṭanga ni thum hnu, nimin khan Home Ministry chuan he thupek hi dan, hold leh hrih a nih thu a tarlang a, "State sorkarte nena inbiakrawn leh hnuah hriattirna hi siamṭhat leh a ni ang," a ti.