Aizawl dist.-ah hmasawnna hnathawh thlirho

Aizawl District Development Coor­dination & Monitoring Committee chu nimin khan DRDA conference hall-ah chairman, Lok Sabha MP CL Ruala leh co-chairman Rajya Sabha MP Ronald Sapa Tlau hoin an ṭhukhawm a, sorkar laipui scheme hnuaia hmasawnna hnathawh hrang hrangte an thlirho.

CL Ruala chuan politician-te chu term nei an nih laiin official-te erawh mipui tana kum tam tak thawktu an nih avangin a bik takin thingtlang hmasawnna atan an pawimawh hle tih sawiin, official-te chu an service hun chhunga mi rethei zawkte hmasawnna thlentu nih tum ṭheuh turin a fuih.

 Ronald Sapa Tlau pawhin thu sawiin, "Mizoramin eng hmasawnna thar nge a hmuh ang tih ngaihtuahna nen hnathawh a nih phawt chuan phur takin hna a thawk theih dawn a, chutiang rilru chu kan put a ṭul," a ti.

Meeting-a tarlan a nih danin, Aizawl district-ah MGNREGA hnuaiah July 2018 aṭanga January 2019 chhungin central leh state fund belhkhawm cheng nuai 5062.14 dawn a ni a, hetaṭang hian cheng nuai 4922.85 (97.25%) chu hnathawh nan hman ral a ni. 

PMKSY-WDC hnuaiah cheng nuai 273.47 dawn a ni a, heta tang hian cheng nuai 124.07 chu hnathawh nan hman ral a ni a, heng fund aṭang hian watershed area 4225.99 hectare a zauah hnathawh a ni a, tui dahkhawlna leh horticulture/ afforestation atan mai bakah Self Help Group din nan leh tih changtlunna atan hman a ni bawk. 

Shyam Prasad Mukherji Rurban Mission (SPMRM) hnuaiah Aibawk leh Thingsulthliah RD Block-ah rurban cluster siam a ni a, hna 15 thawh zawh tawh niin, hna 16 convergence a thawh mek a ni thung. 

Swachh Bharat (Grameen) hnuaiah cheng nuai 916.02 dawn a ni a, cheng nuai 709.51 (77%) hnathawh nan hman ral a ni. Heng sum te hi rural area a ek-in sak nan te, rural mart leh Solid Liquid Waste Management atan te hman a ni.

DDUGKY atan cheng nuai 658.33 dawn a ni a, cheng nuai 653.05 hnathawh nan hman ral a ni a, he scheme atang hian thingtlang mipui, eng la nei lote hnenah eng pek a ni a, BPL chhungkuate hnenah connection thar pek chhuah nan hman a ni bawk. AMRUT hnuaiah cheng nuai 285.82 hnathawh nan hman ral a ni a, heng sumte hi Urban Transport Footpath siam nante leh parks & open spaces siam nante hman a ni. 

Meeting-ah hian Aizawl district-a MLA - Lalrinliana Sailo, Lalruatkima, Vanlalhlana, C Lalmuanpuia, F Lalnunmawia, C Lalsawivunga, Dr. Vanlalthlana, Lalchhuan­thanga leh VL Zaithanzama-te bakah AMC mayor Lalhmingthanga-te an tel.