MJA President-in ASEP seminar a hawng

Association for En­vironment Protection (ASEP) chuan nimin khan MZP conference hall-ah Climate Change & Fire Prevention Seminar an buatsaih a, MJA president Zonunsanga Khiangte-in a hawng.

Zonunsanga Khiangte chuan ramngaw leh nungcha humhalh lama ASEP hmalakna chu chhuanawm a tih thu sawiin, "Award pe theituten hetiang pawl chawimawi tlak hi lo hria se ka duh hle. Climate change hi khawvel buaipui a ni chho ta a, global warming vanga vur tlang kumhlunte tui ta zel chuan tuifinriat chim chin a tisang zel a, khawmual a tlem tial tial dawn tih chu mithiamte sawi leh chhut dan a ni," a ti.

MJA President chuan kan pi leh pute lo neih dan thlakna kan la hmu thei lo chu pawi a tih thu sawiin, "Lo atana ram kan hal ṭhin hi nungchate tan a pawi bakah meikhu in boruak a tibal nasa hle. Kan mithiamten kan lo neih dan, 'environment friendly' lo tak hi a thlakna tur hmuchhuak tawh se a duhawm hle," a ti a, zirlaite leh ṭhalaite chu ram tikang lo tura nu leh pate hrilhtu ni zawk turin a sawm.

Thusawitu dang, ASEP president K Lalmuansanga chuan an pawl hmalaknain mi pasarihin an silai an tung tawh tih sawiin, "Hei bakah hian sairawkherh 5000 chuang, thang 400-500 vel surrender an awm tawh," a ti a, khaw 100 chuangah leh sikul 400 chuangah awareness campaign an buatsaih tawh thu a sawi.

Seminar-ah hian Solomon's High School zirlai naupangte an tel a, MZU-a thawk Dr KC Malsawmzauva chu resource person a ni.