Management-Tech Meet buatsaih

Nimin leh Ningani khan Govt. J Thankima College-ah Management-Tech Meet (VARṬIAN 2019) buatsaih a ni a, Labour, Employment, Skill Development & Entrepreneurship minister Lal­chhan­dama Ralte leh Agriculture minister C Lalrinsangate'n an hmanpui.

Ningania meet hmanpuitu Lalchhan­dama Ralte Mizorama tan skill develop­ment lama hma kan sawn a ṭul thu sawiin, "Zirna tluang pangngai mai zawh loa thiambik nei zirna (skill development) lama Mizote tan ṭan lak a ṭul. BA, MA pass chhuah ringawt hi a tawk tawh loa, thu leh thiamna tak tak pawchhuak tura zirlaite'n ṭan an lak a pawimawh a ni," a ti.

Nimina hmanpuitu C Lalrinsanga chuan ṭhalaiten thil kalphung ngaia kan neih tawhte a ṭha zawnga thlak danglam kan tum tur a nih thu sawiin, "Chumi atan chuan ngaihtuahna kan sen peih a ngai a ni," a ti a, mahni thiamna hmang ngeia eizawnna nei turin ke kan pen a hun tawh thu a sawi.

Management-Tech Meet (VARTIAN 2019) hi Management department, Govt. J.Thankima College in a buatsaih a ni a, Mizoram chhunga sumdawng hrang hrang 14 ten an college campus chhungah dawr (stall) an hawng a ni.