Sumdawnna lama hmalak dan tur sawiho

Confederation of Indian Industries hnuaia ṭhalai pawl, Young Indians, Mizoram Chapter chuan Ningani zan khan Aijal Club-ah Annual Day hmangin thilsiamna leh sumdawnna lama hma thar lak dan tur an sawiho. 

Sawihona hunah hian CII National Council member, Dr. Rahul Mirchandani, Aries Agro Limited chairman chuan thupui thlan sa, Social and Community Entrepreneurship, Governmental Support for Entrepre­neurs leh Innovation and Technological Entre­preneurship-te a sawifiah a ni. 

Annual Day hi session hnihah ṭhen a ni a, session khatnaah Young Indians Mizoram Chapter chuan Mizoram chhunga sumdawnna kaihhnawih ram hmasawnna chi hrang hrang an sawihoa, hmalak dan tur action plan an siam nghal.

Session hnihnaah chapter chairman, LV Lalthantluanga chuan thu sawiin, "Mizo ṭhlalaiten hmasawnna an ngai pawimawh chho zel chu thil lawmawm tak a ni a ti a, Young Indians Mizoram Chapter chuan ṭhalaite hmasawnna kawngah hmalak zel a tum," a ti.

Young Indians, Mizoram Chapter Annual Day pual hian nimin khan Pachhunga University College-a Commerce & Manage­ment zirlaite tan "Business & Entrepreneurship Development" chung­chang sawihona buatsaih a ni.