Myanmar ramri hnai Mizoram khuaah Sipai an duty, khuaah luh a harsa
Tun hnaiah Mizoram chhim lam, Lawngtlai district-a Myanmar ramri hnaih khaw hrang hrangah Assam Rifles sipate duty-in an insem darh a, zin veivâkte uluk taka an enfiah ṭhin bakah, khaw ṭhenkhatah chuan a khaw mite bâk luh an phal rih lo.
Myanmar ramri hnaiha khaw hrang hrangte dinhmun enfiahin Vanglaini palai chu February 22-23, 2019 chhung khan a kal a, hmuh theih chinah hmun eng emaw zatah sipaite'n zin veivak motor zawng zawng an endik. February 23, Inrinni aṭang khan Lunglei Hrangchalkawn piaha TNT hmun bulah pawh sipai duty-in, zin veivak motor leh a chuangte an endik a ni.
Vaṭhuampui lam
In 300 vel awmna Vaṭhuampui khua hi social media hrang hrangah sipaiin mipuite pawnchhuah an phal lo, tiin thu a darh nasa hle. Vaṭhuampui VC secretary PC Vanlaltluanga chuan zawhna chhangin, February 12, 2019 velah an khuaah sipai an awm ṭan thu leh February 20-ah khawpui mipuite khelmualah ko khawmin, sipaiten free clinic an buatsaihsak a, ei turte an pek thu a sawi a, "Curfew a awm lo. Ram kal loh tur an ti a, mahse, ni hnih chiah a ni a, vawiin (February 22) aṭang chuan ram kal pawh an phal leh tawh," a ti.
PC Vanlaltluanga chuan, Myanmar ram chhungah sorkar sipaite leh Arakan Army (AA) inkâp rî an hriat hnuhnun ber chu nikum lam a ni tawh tih sawiin, "Kuminah inkah thâwm kan la hre lo," a ti.
An khua chu an rálmuan thu sawiin, "Engmah hlauhthawn tur a awm lo a, a rálmuan lohna a awm lo," a ti a; sipaite chu khaw chhung hmun pangaah an duty a, chu bakah chuan khaw chhung leh ramhnuaiah an patrol ṭhin thu a sawi.
Vaṭhuampui VC Secretary chuan zawhna chhangin, AA mi leh sa an khuaa an luh leh luh loh an hre thei lo niin a sawi a; tun hmain an khuaah India sipai an awm chilh ngai lo a, tun hi an vawi khat hriatna a nih thu leh, Vaṭhuampuii piah lam ramri hnaih zawk Tuisentlang leh Tuichawngtlangahte pawh sipai an awm thar thu a sawi bawk.
Vaṭhuampui sipai camp-a awm ve 29th. Assam Rifles Assistant Commandant pakhat chuan Vanglaini palai zawhna chhangin, Manipur aṭanga kal an nih thu a sawi a, "Routine exercise a ni mai, heng lai hmunah buaina a awm lo a, ralmuan lohna a awm lo," a ti a; Vaṭhuampui leh Mizoram chhim lama sipai awm zat erawh a sawi thei lo thung.
Vaṭhuampui kawngah hian Bungtlang South khaw daia kawng pengṭhuamah leh Saibawh khuaa Vaṭhuampui leh Vaseikai khaw inṭhenna kawng pengṭhuamahte sipai an duty a, motor veivak reng reng uluk takin an lo enfiah ṭhin.
Vathuampui hi Myanmar ram nena inrina aṭangin a la hla deuh a, an khaw VC Vice President chuan ramri chu kea kalin chawhma kal vel a nih thu a sawi.
Zochachhuah lam
Kaladan Multi Modal Transit Transport Project (KMMTTP) kawngpui lamah pawh hmun eng emaw zatah sipai an duty a; ramri hnaih zual khaw tinah sipai duty in, khaw chhungah tualchhung mite tih loh chu sipaiin luh leh chhuah an remti tawh lo a, February 23, Inrinni chhuna Vanglaini palai kal pawh khaw hrang hrangah luh phalsak an ni lo.
Vanglaini palai chu Inrinni khan Myanmar ramri hnaih ber khua Zochachhuahah te, Myanmar ram chhunga AA helho camp-te pawh hmuh theihna nia sawi Laitlang khuaah te, Laitlang leh Zochachhuah bul lawka Hmawngbuchhuah khuaahte kal a tum a, mahse, sipaite'n an phal loh avangin an lut thei lo a ni.
Zochachhuah bul lawka KMMTTP kawngpui siamnaa hna thawkte chuan, kuminah Myanmar ram chhunga sorkar sipai leh AA sipaite inkâp thâwm an hriat loh thu an sawi.
Nu pakhat chuan, Zochachhuah khuaah khawtual mi ni lo chu sipaiin luh an phalsak tawh lo nia a hriat thu a sawi a; Hmawngbuchhuah khaw dáia pa pakhat chuan, an khua (Ngengpuitlang)-ah pawh an luh leh chhuah dawnah sipai duty-te identity card entir zel a ngai a, an kalna tur hrilh zel a ngaih thu a sawi bawk.