Thlawhtheihna dang a service theihna atan Theihtawpin hma kan la - Civil Aviation
GAD principal consultant (Civil Aviation) wing commander J Lalhmingliana chuan Lengpui Airport-ah thlawhtheihna dang a service theihna atan hma an lak mek thu a sawi.
Vanglaini palai zawhna chhangin J Lalhmingliana chuan thlawhtheihna service dang a awm theihna atan hian theihtawp an chhuah thu a sawi a, "Tunlai hian khawvel pumah thlawhtheihna company-te an tlachhia a, Jet Airways-a 24% share nei Al Etihad pawh sumah an buai mek a, an thlawhtheihna book thawh dollar maktaduai 7.5 man hu te pawh an cancel leh a ni," a ti.
J Lalhmingliana chuan Indigo nen pawh an inbiak reng thu sawiin, "Anni hian lokal an duh a, pisa leh thawktute quarter kan pek theih dan turte min lo zawt a ni. Mahse, harsatna awm chu thlawhtheihna rawn service tir an tum airbus 320 hi Lengpui Airport runway-in full load chuan a zo loa, he harsatna hi buaipui mek a ni," a ti a, Indigo-ah hian beiseina sang tak an neih thu a sawi.
GAD Principal Consultant sawi danin, Lengpui Airport runway chak leh khauh zawng chu an hawn tirh khan 36 PCN a ni a, airbus 320 full load-a ṭumna atan chuan 40 PCN a ngai a ni.
Lengpui Airport runway hi hawn a nih hnuah resurfacing tih tawh a ni a, hemi hnu hian a PCN teh a la ni lo. Tunlai hian runway PCN dinhmun chiah teh mek a ni a, 40 PCN a lo tling a nih chuan Indigo-te hi an service thei dawn a, a tlin loh chuan tih tlin tum a ni.
J Lalhmingliana chuan Air India pawh additional flight siam turin an nawr reng thu sawiin, "Governor, Rajya Sabha MP leh Mizoram BJP-te pawhin thuneitute an sawipui tawh a, mahse chhanna mumal kan la dawng lo. Chief Minister Delhi-ah a kal leh dawn a, ani pawh hian Indigo an service hma chuan Air India-in addl. fight an neih theihna atan thuneitute a dawr nghal dawn a ni," a ti.
Thlawhtheihna chuan man chungchang an hriatthiam bik loh thu sawiin J Lalhmingliana chuan, "Lengpui to Kolkata hi boruak melah chuan Silchar to Kolkata aiin a hnai zawk a, mahse a chuan man a sang zawk daih," a ti a, company lamin thlawhtheihna chuan man rate an siam dan an zawh pawha an sawi ṭhat duh loh thu an sawi.
Tun dinhmunah Lengpui Airport aṭangin Air India chiah a service-a, nitin vawi khat Lengpui - Kolkata leh Kolkata - Lengpui an service a, ṭum hnih Imphal-ah an kawi a ni. Mizoram sorkar chuan Air India kartin ṭum nga, Kolkata - Imphal leh Imphal - Kolkata direct flight awm chu, Mizoramah kawi ve ṭhin turin an ngen a ni.