Armed Forces (Special Powers) Act MZP-in a tawp thlenga dodal an tum

MZP chuan Inrinni khan an pisa-ah emergency meeting an nei a, Mizoram leh hmarchhak state dang palia Assam Rifles hnena Armed Forces (Special Powers) Act hmanga thuneihna pek tumna awm chu a tawp thlenga dodal nise, an ti.

MZP chuan Armed Forces (Special Powers) Act chu an telna North East Students Organisation (NESO) chuan hun rei tak chhung ṭhiat turin India a lo ngen tawh tih tarlangin, "Chu ngenna chu a ngai pawimawh lo mai ni loa state pangaah Assam Rifles te he dan hmanga thuneihna pek a tum hi na kan ti hle. India sorkarin tunah he a thil tum hi titawp rihin, ngaihtuah ṭhat leh turah a dah a, titawp hlen tur leh he dan hi ṭhiat turin India sorkar kan phut a ni," a ti.

Armed Forces (Special Po­wers) Act hian sipaite hnenah warrant tel loa mi man theihna te, mi veh leh mi in dap theihna te, silai hmeh puah phalna thlengin a pe tih tarlangin MZP chuan, "Hmarchhak state ṭhenkhatah he dan hi hman mek a nih bakah tunah Mizoram leh state dang paliah Assam Rifles te chu warrant tel loa mi man phalna leh thil zawn phalna pek a tum leh hi hriatthiam har kan ti hle," a ti a, act hi Zoramin zalenna a sual laiin India sorkarin Mizoramah a lo hman tawh thu an sawi.

MZP chuan Armed Forces (Special Powers) Act-in tihduh­dah phalna a pek angin India sipaite'n nasa takin Mizo mipui min lo tiduhdah tawh tih tarlangin, "Khang laia kan tuarna kha intihduhdahna satliah ni loin, dan hmang ngeia intihduhdahna a ni. Danin sepcial power a pek India sipaite'n Mizote kutthlaka an duh duh an man te, jail an tantir te, chhek in an hal te, kan in leh lo an tichhia te, pawngsual thlenga min tihduhdahnate kha he act hman a nih hun laia thleng a ni," an ti.

Armed Forces (Special Powers) Act an duh loh chung­chang hi MZP chuan Prime Minister hnenah thlen an tum bakah, Ministry of Home Affairs order hal an tum a ni.

MZP chuan tunhnaia Mizoram hmun hrang hranga sipai an inzar pharh chungchang pawh sawihoin, "Khaw hrang hrangah Assam Rifles an inkhuar a, an inkhuarna khaw mipuite bangbo tak leh hlauthawng ru taka an awm hi a pawi hle. Chutiang hun kan tawn laia India sorkarin Assam Rifles te warrant tel loa mi man phalna pek a tum uaih uaih mai hi mak kan ti a, sipaite hi exercise la anga sawi an ni tlat mai te hi thil ngaihṭhatthlak loh inphum theiah a ngai a, mipuite himna ngaihtuah tur leh thlamuan turin Mizoram sorkar kan beisei," an ti.