Kohhran hruaitu hmaa thudik lo sawiah MPCC-in CM Zoramthanga an puh

Mizoram Pradesh Congress Committee (MPCC) chuan thu­chhuah siamin, kohhran hruaitu hmaa thudik lo sawiah chief minister Zoramthanga an puh.

MPCC chuan Zoramthanga hian February 21-a Synod Executive Committee member-te leh MLA tling tharte inkawmnaah Lengpui Airport-a thlawhna service tlem chungchang sawiin, 'Ka hmuh­chhuah thar chu thlawhtheihna runway khu a rei tawh lutuk a, resurfacing tih a nih ngai loh avangin thlawhtheihnate an thlawk ṭha duh lo' a tih thu tarlangin, "Chief Minister-in kohhran hruaitute hma ngeia hetianga a thil hmuhchhuah thar, dik bawk si lo a puang leh ta mai hi MPCC chuan pawi a ti tak zet a; thu belhchiandawl lo hi Kohhran hruaitute hmaa sawi tawh lo turin a ngen a ni," a ti.

MPCC tarlan danin, Lengpui Airport-ah hian Air India (sorkar ta) leh Jet Airways (private company) a service ṭhin a, Jet Airways hian February 10, 2019 aṭangin Lengpui Airport-a an service chu an titawp a ni. Hetihrual hian North East a airport dang- Silchar, Jorhat leh Imphal service-te pawh an titawp a ni. Hetianga Jet Airways-in North East-a service an tihtawp nachhan hi media hrang hrang report-ah chuan sum leh paia Jet Airways Company nasa taka a tlakchhiat vang ti a report a ni deuh vek a ni.

India ramah hian BJP sorkar hnuaia Aviation Turbine Fuel (AFT) man to chak lutuk leh hnathawkte hlawh sang lutuk kara customer hip nana thlawhna chuan man intih tlawm siak ngai bawk si chu thlawhna company-te hian an tuar nasa hle tih newspaper tam takah chhiar tur a awm tih tarlangin MPCC chuan, "Jet Airways tlakchhiat chhanah ngei pawh fuel man to lutuk leh pawisa hlutna tlahniam puh a ni ber. December 2018-ah khan media hrang hrangah Jet Airways chuan sum leh paia an tlakchhiat avangin hmun eng emaw zata service tihtawp an tum thu hi an lo puang tawh a ni," a ti.