KHAWTHLIR

Aizawl DC atana dah thar Vanlalngaihsaka chuan February 22 khan DC charge latu VL Hruaizela hnen aṭanga DC charge lain, a hna a zawm. DC thar hian DC pisa-a officer leh staff-te kawmin, Lok Sabha inthlanpui lo awm tura hmalaknate an thlirho nghal a ni. Vanlalngaihsaka hi  Mizoram Civil Service 1991 batch niin, April 13, 2015 khan Indian Administrative Service 2007 batch-ah lak luh a ni.

February 23, Inrinni khan Upper Republic Branch KṬP chuan Aizawl Civil Hospital tan thisen unit 41 an pe a, a petute hi mipa 31 leh hmeichhe 10 an ni. Model Veng Branch KṬP pawhin an kohhran hall-ah blood donation camp an huaihawt a, mipa 28 leh hmeichhe pakhatin Synod Hospital tan thisen unit 29 an pe.

Social Welfare minister Dr. K Beichhua chuan February 22 khan Thingsulthliah-a ruihhlo ngaite enkawlna hmun PISGAH a tlawh a, Mizoram sorkarin ruihhlo do kawnga theihtawp a chhuah thu sawiin, "Ruihhlo avanga harsatna tawk Mizo ṭhalaite sorkarin kawng dik lo aṭanga kawng dika hruai  a tum a ni," a ti. PISGAH June, 1999 khan Mizoram Social Defence & Rehabilitation Board (MSD&RB) hnuaia din a ni a, February 12, 2018-a  Council of Minister ṭhukhawm chuan tih changtlun turin thuthlukna a siam a ni.

Mizoram Baptist Kohhhran, Shillong (BCM Shillong) biak-in, Lumsohphoh, Shillong ami chu Inrinni khan BCM general secretary Rev. F Ramdinmawia'n a hawng. Biak-in hawn lawmna hun hi nimin khan buatsaih a ni a, Shillong bialtu pastor Rev. R Lalrintluanga'n kaihruaiin, BCM president Rev. Lalbiaksanga Chinzah-in Pathian thuchah a sawi.

The Salvation Army chuan February 20 aṭang khan Synod conference centre-ah thianghlimna kawnga insawrbingna leh inzirtirna 'The Brengle Institute' an buatsaih a, nizan khan a ṭiak. The Brengle Institute 2019 hi chief secretary, lt. colonel SP Simon-in a hawng a, officer 14 leh territorial evangelical speaker pakua an tel.