Kan sorkar hi kohhran hote Ṭawngṭai chhanna - Ruatkima

Lalruatkima chuan, nikum lamah kohhran an mangang a, Zoram mipuite an thlaphâng nia sawiin, "Kohhran hote an ṭawngṭai rual a ni. Kan ṭhat leh fel bik vang ni loin, Pathianin hriak min thih a, chuvangin, kan sorkar hi kohhrante ṭawngṭai chhanna a tih loh theih loh," a ti a; Zoramthanga kaihhruai sorkar chu Pathianin malsawmnaa a vûr zui ngei a rin thu a sawi.

Inthlan dawnah mipuiah eng nge zawrh tur tiin uluk takin ngaihtuahna an sên thu sawiin Lalruatkima chuan, "Uluk taka kan ngaihtuahin zu zawrh tihtawp kan tum thu kan sawi a, Cabinet meeting hmasa berah zu zawrh tihtawpna atan hma kan la a, dru day kan puang nghal a, session hmasa bera pharh turin zu zawrh tihtawpna tur bill buatsaih mek a ni. Hun thim aṭangin chhungkaw tam takin khawvar an hmu zel," a ti.

MLP Secretary chuan school timing sawiselna a tam thu sawiin, "Kan society nen a inmil lo tia sawiseltu an tam hle a, chuvangin, Cabinet-ah ngaihtuah a ni," a ti a; academic session tharah chuan Mizo society nena inmil tura school timing kalpui a ni dawn niin a sawi. 

Lalruatkima chuan, thingtlangah kawng siamin an hnatlang luih luih ṭhin nia sawiin, "Kawng chhiat vangin lirtheite kawng dungah an táng pût zel. Tunah chuan kawngah motor ding an awm ve pawhin, kawng siam chhung an lo nghah ṭhin vang a ni. Kan hriat ngai tawh mang loh JCB leh roadroller rite kan hre leh a, kawng a mâm ta hun mai," a ti.

CM Zoramthanga'n traffic jam free-a Aizawl siam a tum thu a sawi chu mi tam takin an nuih tih sawiin Lalruatkima chuan, "Vaivakawn leh Bawngkawna traffic jam nasa lutuk tihrehna atana kawng chhâwng siam dan tur hetiang lama mithiam Delhi-a mite'n an enfiah dêr tawh," a ti a; Mizoram chuan hruaitu vision ṭha, ngaihtuahna sêng a nei niin a sawi.

MNF chuan inthlan hmaa mipui hnena an thutiamte an tihhlawhtling zel nia nia sawiin MLP Secretary chuan, "Zoram hmasawnna thawk turin kan inbuatsaih zel a, chumi atan chuan Zoram mipuite ṭawiawmna kan ngen a ni. Kum 20 chhung a záwna sorkarna siam hi kan hmathlir a ni," a ti. 

Lalruatkima chuan, Congress party-in MNF sorkar sawiselna tur an hre lo nia sawiin, "Kan sum neih sa hmangin hna an thawkte an ti a, tun financial year chhung pawhin October 2018 thleng hnathawhna hun an nei a, ni 72 kan sorkar chhungin a let tam takin kan thawk hnem zawk," a ti a; Congress party chu an inthlan hun hun an buai hun niin a sawi. 

ZPM chungchang sawiin Lalruatkima chuan, "ZPM lah hi engtin nge an awm pawh kan hre lo. MPC leh ZNP ten a hran ve vein office an hawng a. ZNP a awm tawh lote an ti a, an puin ZNP a awm tawh lo tih an sawi bak a hran rel a awm loh thu a naute'n an sawi. MPC lah PC humhim tumin president berin a bei mek a ni," a ti.