Capt. Sanghnuna Pûk hming puang

MNF party chuan Sumsuih rama Thingsei Khâmpûk chu 'Capt. Sanghnuna Pûk' tiin a hming an vuah a, hming vuah thar pual hian nimin khan Sumsuih-a Sai­chhunga inah inkhawm an buatsaih a, minister R Lalzirliana'n a hmanpui. 

R Lalzirliana chuan, Thingsei pûk chu kum­khua atan Capt. Sang­hnuna Pûk tih a nih tawh tur thu a puang a; "MNF movement kha a theuneu lo a, a ropuiiin a lian em em a, Pathianin Mizote hnam anga min din hnuah khatiang tluk movement a piang leh tawh lo ang," a ti.

Kum 30 chuang kal taa ram tana nunna hlantute chawimawi nachang hre thar zel tura mipui sáwmin Lalzirliana chuan, "Mi ropui leh huaisen, hnam chhana thi ngam kha an ngaihsanawm em em. Ṭhian chhah thih ngam, Zo nun ze mawi kha ṭhang­tharte'n chhunzawm zel ang che u," a tui a; kum 100 a liam leh hunah chuan MNF movement chu history a nih tawh dawn avangin a hriatrengna tur a tam thei ang bera siam a ṭul thu a sawi.

Inkhawmah hian bialtu MLA Prof. F Lalnun­mawia leh MNF hotute zinga mi K Vanlalauva te pawhin thu a sawi a; K Vanlalauva chuan, Capt.Sanghnuna chu Mizo hnam chhana martar a nih thu a sawi a ni.