Mizoram kawngpui hmasawnna tur CM-in Union Minister a sawipui

New Delhi-a chám mek chief minister Zoram­thanga chuan nimin khan Road Transport & High­ways minister Nitin Gad­kari chu a chenna banglaah a kâwm a; Mizoram kawngpui tihhmasawn dan tur a sawipui.

Chief Minister chuan, Mizoram chu ruahtui tlak tamna a ni a, alkatra hmanga kawng siam a tlo ṭhin loh avangin cement concrete hmanga kawng siam a ṭhat zawk thu a sawi a; Lok Sabha inthlanpui puan hma ngeia Mizorama kawng­pui siamṭhatna tur estimate sanction turin a ngen.

Zoramthanga chuan, Mizoram leh hmarchhak economy siamṭhata tihngheh nan uar zawka mau chîn a ṭul thu te, mau phurh vel nan bamboo link road a pawimawh thu te, Mizorama national highway tam zawk National Highways and Infrastructure Development Corpora­tion kuta pek tum chu ennawn leh a duh thu te, NH-54 pumpui Lailapur aṭanga Tuipang thleng bakah, highway tênaute chu Mizoram PWD kuta dah an duh thute a sawi.

Nitin Gadkari chuan, Seling-Champhai khaw kar kawng hmun pahnih te, New Vervek-Tuivai kawng siamna tur leh, Tuivai lei dawh ṭhatna tur te, Lengpui Airport kawng Tlawng lei dawhna tur leh kawng ṭhenkhat thawm ṭhatna tur chu rei lote chhunga sanction tihchhuah mai theih a nih thu a sawi a; hnate chu hmanhmawhthlak an nih avangin, sanction chhuah hmaa tender chhuah mai CM Zoramthanga'n a dilna chu a remti a ni.

Lunglei-Tlabung kawnga Phairuangkai lei leh Durtlang-Sihphir kawng zauhna tur pawh a rang thei anga sum pe chhuak tura hmalak tum a nih thu Union Minister chuan a sawi.

Chief Minister hi Delhi Mizoram House resident commissioner Umakant leh PWD chief engineer K Lalsawmvela ten an ṭawiawm a ni.