Chhawmdâwl dan tur sawiho

Disaster Management & Rehabilitation (DMR) minister Lalchamliana chuan nimin khan Lunglei a tlawh a; tun hnaia rial tla vanga harsatna tâwkte chhawmdawl dan tur Circuit House-ah sorkar official-te a sawipui.

DMR Minister chuan, rial tla vanga chhiat tâwkte chu thinlung taka a tawrhpui thu sawiin, ṭhahnemngai taka chhawmdawl hna kalpuitu sorkar official te, tlawmngai pawl te, khawtlang hruaitute leh mipuite lawmthu a hrilh a, "Chhawmdawl hna kalpui tura sum mamawhte a rang thei ang bera tifel turin hmalak a ni ang," a ti.

Lunglei SDC Lal­chhanhimi'n meeting-a a tarlan danin, Lunglei khawpui chhung leh a chhehvela village council 27 aṭanga report an dawn danin, rialin in chung a den chhiat zat chu in 2,068 a ni a, chu'ng zinga in 948 chu nasa taka chhia (major damage) a ni.

Chhawmdawl hna kalpui turin State Disaster Response Force (SDRF) aṭangin Rs. 49,24,400 mamawh a ni a, DMR Directorate-ah report kimchang thehluh a ni tawh.