May 31 hmaa Zokhawsanga insawn turin MHA-in Aizawla Assam Rifles-te hriattir

Ministry of Home Affairs (MHA) chuan February 19, 2019 khan office memorandum ti chhuakin, Aizawla Assam Rifles Battalion headquarters (Lammual leh a chhevel) chu May 31, 2019 hmaa Zokhawsanga insawn tura tih an nih thu a tarlang. 

MHA tarlan danin, MHA Addl. Secretary (Police) kaihhruaina hnuaia February 7, 2019 meeting thuchhuak angin, Aizawla Assam Rifles-te hi Zokhawsanga insawn tura tih an ni. 

Thudawn danin, Assam Rifles eng emaw zat chu Zokhawsangah hian hun eng emaw chen awmtir an ni tawh a, an vaia insawn tur chuan kawng, tui leh electric lamah tihfel tur hmabak a la awm. Assam Rifles hotute chuan heng an mamawh hrang hrangte peih fel turin Mizoram sorkarah an thlen a, tihfel a nih hnuah an insawn ang. 

Kawng ṭha, tui leh electric eng  pek hi Assam Rifles leh Mizoram sorkar inremnaah a tel a, hengte hi Mizoram sorkarin an pe thei a nih chuan Assam Rifles lam hian insawn chhuah an inpeih tawh niin Vanglaini chuan thu a dawng a; AR insawn chhuahna tur Zokhawsangah hian tlemlai deuh aṭang khan kawngpui ṭha tak siam a ni tawh a, êng pawh pek zawh a ni thawkhat tawh. 

Kum 2012 khan hetihlaia AR DIG, Brig SP Rawat chuan AR ram chhuahsan an tum hnaih avangin AR ram chhunga LSC neite chu an LSC sorkara pe kir vek turin hriattirna a tichhuak a, pe lut lo an awm a nih chuan FIR an thehluh tur thu a lo sawi tawh. AR DIG hian July, 2012 khan LSC neitu sorkara pe kir ve lote lakah FIR a lo thehlut tawh a ni. 

Thudawnnain a sawi zel danin AR-te hi Zokhawsang lama an insawn hnuah tuna quarter guard awmna hmun acre 15.61 chu sipai company khatin an la awm chilh ang a, Lammual leh a chhehvela hmun acre 89.93-a zau chu chhuahsanin state sawrkar kutah hlan a ni ang.