Vanglaini logo

Chapchar Kûta venhimna lam hriattirna

Aizawl SP C Lalzahngoa kaih­hruainain Mizoram police-a Aizawl DEF leh Excise & Narco­tics department (END) hotute leh Central YMA hruaitute chu ni­min khan Aizawl SP pisaah anṭhu­­khawm a, tun kar Ningani leh Zirtawpnia Chapchar Kût hman tura venhimna chungchang an sawiho. Meeting-a an rel angin, Aizawl SP pisa chuan mipui hnena ngenna leh hriattirna a tichhuak nghal.

Aizawl SP pisa thuchhuah chuan, Chapchar Kût chu mipuiin hlim leh thlamuang taka an hman ṭheuh theih nan venhimna uluk taka kalpui a ni dawn tih a tarlang a, "Ruih theih thil - zu, drugs leh a kaihhnawih, mipui hlimna tichhe thei leh harstana siam theite lakah inthiarfihlim a, ti lo turin kan inngen a. Kût hlim tlang taka kan hman theih nan Police, Excise & Narcotics leh CYMA-te'n ruahmanna siamin, duty uluk taka tih tum a ni," a ti.

Police, END leh CYMA ngenna
1.    Chapchar Kût hmanna tur Lammualah hian Police, Excise leh YMA-te joint duty indah a ni dawn a, gate-ah mipuite enfiah a ni ang a, zu leh ruihhlo chi reng reng leh hriamhrei ken luh phal a ni dawn lo a, keng an awm chuan mansak zel an ni ang. A ṭul angin an chungah action lak zel a ni ang.
2.    Kût hmanna hmun leh a velah tumah buaina siam lo tur leh zu leh ruihhlote ti lo turin kan inngen a, ruih theih thil ti man chhuah an nih chuan an chungah hmalak zel a ni ang. Mite tana harsatna siam lo turin kan inngen a ni.
3.    Main gate-ah hian mipui kan innêk buai loh nan luh leh chhuah dan fel taka kalpui tum a ni. Lammual chhung aṭanga chhuak turte'n hetiang hian chhuah ni se: Chhim lam gate-ah ground chhung leh khawchhak lam leh chhim lam panga gallery-a awmte chhuahtur a ni a, hmar lam gate-ah ground-a awm leh hmar lam gallery leh khawthlang lam gallery (tlanga thute/awmte) an chhuak ang. Tlang lama ṭhute chu chhim lam gate-ah chhuah phal a ni lo ang. Mipuite'n gate-a duty-te thu leh hla ngaichâng thiam 
ṭheuh turin kan inngen a ni.
4.    Kût ní-ah hian phalna nei lo chu tumah Lammual chhungah thil zawrh leh zawrh tur ken luh phal a ni dawn lo a, duty-te'n an lo enfiah dawn a ni.