Lemchan leh lâm inkhawmpui buatsaih

Sangeet Natak Akademi, New Delhi bultumin Art & Culture department leh T Romana College chuan nimin aṭang khan T Romana College auditorium-ah ni li awh tur India hmarchhak lemchan leh làm inkhawmpui, ‘North East Natya Sangam 2019’ an buatsaih a, minister C Lalrinsanga'n a hawng.

C Lalrinsanga chuan, hnam rohlu, lâm leh lemchan pholanna hun ṭha buatsaih a ni chu lawmawm a tih thu sawiin, "State hrang hrang intlawhpawhna leh thawhhona chuan lungrualna leh inunauna nasa lehzualin a thlen ka beisei. India rama hnam hrang hrang zingah hnam tlem leh tê zawkte hian hriat an hlawh lo hle a, India hmarchhaka hnam nunphung leh ziaráng phochhuahna atan festival hi a pawimawh hle a ni," a ti.

Rimawi leh lâm chu Mizote tan hnam nihna (identity)-in a ken tel a nih thu sawiin C Lalrinsanga chuan, "Kan pi leh pute aṭanga kan rochun a ni. Hetiang hun duhawm tak hi zirlaite'n a ṭha thei ang berin kan hmang ṭangkai tur a ni," a ti a; Mizo hnam nunphung leh ziaráng hlut thiam a pawimawh thu a sawi bawk.

North East Natya Sangam-ah hian Assam, Manipur, Nagaland, Tripura, Sikkim, Arunachal Pradesh, Mizoram aṭangin lâm leh lemchan entir a ni dawn a; 'Prespectives: Theatre in NE India’ tih thupui hmangin seminar buatsaih tur niin, mithiamte thuziak zirho a ni ang.