Kolkata-ah Chapchar Kût an hmang

Calcutta Mizo Welfare Association chuan February 23, Inrinni khan Mizoram House, Ballygunge-ah Chapchar Kût an hmang a, minister Lalchhandama Ralte chu kût pa niin, mahni hnam zia theihnghilh chu hnam boral zia a nih thu a sawi.

Lalchhandama Ralte chuan, "Chapchar Kût hi Mizo hnam kan inpho chhuahna a ni a, hnam dang kara awmte tanṭan lak zel a ṭul," a ti a; Kolkata-a Mizo awmte chu Mizo nihna leh Kristianna vawng nung tlat a, missionary an ni tih hre reng turin a chah.

Zirlaite chu ram ma­mawh chhanna ni tura fuihin Minister chuan, "Civil service-a lut kan Mizo rual ûte an liam zel a, hnam dangin post pawimawh an luah mek a, chuvangin, ram mamawh chhanna tum ṭheuh turin ka ngen a che u. Hnamin a mamawh che u a, hnamin a ko che u. Ṭang rawh u, in ti thei a ni," a ti.

Kolkata-ah hian Mizo 1,000 vel an awm a, kum 40 kal ta aṭang khan Chapchar Kût ni tak hnaivai hun remchangah Chapchar Kût an hmang ve ṭhin a ni.