Health Minister-in NEIGRHIMS a tlawh
Health minister Dr R Lalthangliana chuan February 23, Inrinni khan Shillong-ah NEIGRHIMS, North Eastern Hill University (NEHU) leh Mizoram sorkar enkawl hostel pathumte a tlawh a; hostel ṭanpuina a pek bakah, Shillong MSU hruaitute nen an inkâwm.
Health Minister chuan, NEIGRIHMS a tlawhnaah medical superintendent Prof. Noor Topno hoin an lo dawngsawng a, meeting a neihpui nghal. Minister chuan, Mizoram aṭangin damlote'n NEIGRIHMS an pan nasat thu leh admission hmuh harsat thu sawiin, chumi chungchangah chuan hma laksak tur leh damdawi-in chhehvela Mizo damlote tana riahna ruahmansak turin a ngen.
Higher & Technical Education minister ni bawk R Lalthangliana chuan, NEHU campus-a Mizo zirlaite a tlawh a, Shillong-a Mizoram sorkar enkawl hostel pathum - Girls Hostel pakhat leh Boys Hostel pahnihte tlawhin an dinhmun a enfiah. NEHU campus leh hostel-ahte hian ṭanpuina sum a hlan zel a ni.
NEHU zirlaite hostel a tlawhnaah Dr R Lalthangliana chuan, "Technology sang zel mila kan kal thiam chuan Mizo zirlaite hi kan sang zelin ka ring. Mizo kan ni a, hnam dang zingah kan danglam tur a ni a, keimahni avangin hnam dangin Mizo nih an châk tur a ni," a ti.
Minister hian nimin khan Silchar Mizoram House a tlawh a; chumi hnuah Vairengtea Commerce & Industries checkgate leh Vairengte damdawi-in te, Bairabi damdawi-in, Thingdawla Nursing School leh Kawnpui damdawi-inte a tlawh leh bawk.