KHAWTHLIR

Excise & Narcotics department chuan zu zawrh phalna leh khuahkhirhna dan, MLPC Act thlakna tur, zu khap burna tur bill an peih tawh a, Law & Judicial department-ah enfiah turin an thawn tawh. Bill hi Assembly session hmasa berah pass tura pharh tum a ni.

Vawiin leh naktuk hian Pachhunga University College auditorium-ah All Mizoram Village Council Conference 2019 neih a ni dawn a, LAD minister K Lalrin-liana leh minister Lalruatkima ten an hmanpui ang. Conference hi Local Administration Department (LAD), State Institute of Rural Development & Panchayati Raj (SIRDPR) leh All Mizoram V/C Association (AMVCA)-te buatsaih a ni.

YMA sub-headquarters, Serchhip chuan nimin khan Mizoram MP pahnih - CL Ruala (Lok Sabha) leh Ronald Sapa Tlau (Rajya Sabha)-te chunga lawmthu sawina hun, Sub-Hqrs. YMA pisaah an buatsaih a, MP pahnihte'n an hmanpui. Serchhip Sub-Hqrs. YMA president R Sang-hmingthanga chuan, Serchhip Sub-Hqrs. Office building chu MP CL Ruala’n a fund Rs. 10,00,000 a pek aṭanga bul ṭan a nih thu leh, Ronald Sapa Tlau pawhin ruang phurhna tur motor a pek tawh thu a sawi.

Assembly speaker Lalrinliana Sailo chuan nimin khan Khawhai khuaa Rina Indoor Stadium sak thar a hawng. Lalrinliana Sailo chuan, Pathian khawngaihna leh malsawna avangin tun hun thleng thei a nih thu sawiin, Khawhai mipuite thlâwpna leh ṭawiawmah lawmthu a hrilh. Indoor stadium hawn tâk hi a dung ft. 70 leh a vâng ft. 40-a zau a ni.

Mizoram Blind Society (MBS) chuan nimin khan White Stone conference hall-ah an din champha lawmna hun leh general body meeting an hmang a, Mizoram Legal Service Authority member secretary Vanlalenmawia leh ATI-a professor Lalnunmawii Varte ten an hmanpui. A hmanpuitute hian MBS 

ṭanpuina atan Rs. 2,000 ve ve an pe a ni.