Lirthei intlan chhawk dan thar Gauhati High Court-in a stay

Vawiin aṭanga hman ṭan tura Mizoram sorkarin lirthei intlan chhawk dan thar a ruahman chu Gauhati High Court, Aizawl Bench-in hman hrih loh tura a stay avangin hman theih a ni hrih dawn lo.

Mizoram Bar Association (MBA) chuan lirthei intlan chhawk dan thar mipuite dikna rahbehnaa ngaiin High Court-ah hian May 30 khan public interest litigation (PIL) an thehlut a ni. MBA-te PIL hi nimin khan ngaihtuah a ni a, High Court chuan lirthei intlan chhawk dan thar hi June 6, 2019 thleng a stay-a, hemi ni vek hian a ngaihtuah ṭha leh ang.

Vanglaini palai zawhna chhangin MBA hruaitute chuan ni khata lirthei pahnih zel dintir chu mimal zalenna rahbehnaah an ngaih thu an sawi a, "Tuna intlan chhawk dan hman mek hi chu awm tawk kan ti tho. Lirthei number tawpna indawt neite phei chu ni khatah an lirthei pahnih khalh chhuah theih loh a ni ringawt dawn a ni," an ti.

MBA hruaitute chuan lirthei intlan chhawk tur tih a nih chuan Governor aṭanga peon thlengin intlan chhawk ni se tih chu an ngaihdan a nih thu an sawi a, "Tunah chuan intlan chhawkin a huam loh an siam leh tho si," a ti a, mipuite chu inang khat veka en ṭha an tih thu an sawi.

April 25, 2019 a Coordination Committee on Traffic Management ṭhukhawm chuan lirthei intlan chhawk dan thar hi an siam a, hemi bawhzui hian Traffic SP chuan notification a chhuah a ni. Ruahman dan chuan intlan chhawk dan thar hi June thla chhung en chhin phawt tur a ni.

Intlan chhawk dan tur ruahmanna tharah chuan Thawhṭanniah lirthei number digit tawp ber 1 leh 2 a tawp an tlan thei dawn loa, Thawhlehniah 3 leh 4, Nilainiah 5 leh 6, Ninganiah 7 leh 8 leh Zirtawpniah 9 leh 0 an tlan thei dawn lo. Sorkar chawlh, Inrinni leh Pathianni a huam lo ang.

Tuna intlan chhawk dan hman mekah chuan lirthei number digit tawp ber leh ni zat inang a nihin tlan phal a ni loa, Pathianni chauh a huam lo thung. Court-in ruahmanna thar a stay avang hian tuna intlan chhawk mek dana intlan chhawk chhunzawm hrih tur nia thu dawn a ni.