Fall armyworm thunun a ni tawh - Agriculture dept.

Agriculture department chuan thuchhuah siamin vaimim ei chhetu fall armyworm puang chu thunun a nih tawh thu an tarlang a, "Vaimim pawh a thar pangngai ang zat thar leh tura beisei a ni," an ti.

Agriculture dept. tarlan danin, Ministry of Agriculture hnuaia Directorate of Plant Protection-a joint director Dr N Sathynarayanan chuan tun hnai khan Sailam khaw miten vaimim an chinna hmun a tlawh a, fall armyworm-in nasa taka a beih hnua an thunun leh thei chu lawmawm a tih thu Agriculture dept.-a thawktute leh loneitute a hrilh.

Dr N Sathynarayanan chuan fall armyworm beih kawngah Agriculture dept. fakin, "State dangte entawn tlak hiala ṭan in la hi Ministry of Agriculture-ah pawh ka thlen ang," a ti a, loneitute chu pangang do kawngah ṭan la lehzual turin a chah.

Dr N Sathynarayanan hian district tina Agriculture dept. aiawhte hnenah fall armyworm control na atan bio-agent (chemical hmang loa rannung control na) Trichogramma Pretiosum leh Meterhizium Anisophele a sem a, a hman dan tur a zirtir nghal a ni. 

Heng Bio Agent te hi thilnung an ni a, hetia thlai a an va tih darh hian anmahniin an inthlahpungin thlai hmunah hian an khawsa tlang ṭhin, Trichogramma hian fall armyworm tuiah ama tui a va phumin Trichograma hi a rawn piang chhuak ta ṭhin a ni.

Metarhizium hi chu fungi (hmuar chi khat) a ni a, hei hian pangangte hi tihlumin, pangangah khan fungi hi a rawn nung chhunzawm a, khang pangang thi te vaikhawma rawt sawm leh chu, tui nena pawlhin pangang dang thah nan a la hman chhoh zel theih a ni.