KHAWTHLIR

Legal Metrology, Siaha chuan nimin khan Rama Filling Station, Siaha-a unload tur tanker AS - 01GC/7483 a phurh chu a quality a ṭhat loh avangin an man. Petrol hi Silchar depot aṭanga phur chhuah a ni a, motor neitu chu Rama Filling Station a ni a, Pradip Chasa, Assam khalh a ni. Driver hian challan-a density in print sa chu ziak ṭhain chu mi zulzui chuan oil hi a rawn khawih chingpen ngei a ni tih hmuhchhuah a ni. Driver hi Siaha Police kutah hlan a ni.

Higher and Technical Institute (HATIM), Lunglei chuan nimin khan an auditorium-ah graduate tharte thlahna hun an buatsaih a, Higher & Technical Education minister Dr R Lalthangliana'n a hman pui.

Mizoram Pradesh Congress Committee (MPCC) hruaitute Ningania Congress Bhavan-a ṭhukhawm chuan resolution pass-in All India Congress Committee (AICC) president Rahul Gandhi chu AICC president ni chhunzawm zel tura an duh thu leh a lamah an ṭan tlat tur thu an tarlang.

Ramchhung hmundang rualin nimin khan Chhimveng YMA Hall, Mamit-ah World No Tobbacco Day, 2019 chu hman a ni a, Mamit DC Dr Lalrozama'n a hman pui a, zuk leh hmuam laka fihlim turin zirlai naupangte a chah. Inkhawmah hian social worker K Lalnunhlimi chuan vaihlo leh a kaihnawihin taksa a khawih chhiat theih dan hrang hrang leh COTPA dan hnuaia vaihlo leh a kaihnawih khuahkhirhna dan hrang hrang a lem nen a sawifiah.

AOC, Lungleia Mizofed Petrol Pump chu ni khata darkar 24 in hawng tawh turin nimin khan Co-operation minister C Lalrinsanga'n a hawng a, petrol thun chungchanga sawiselna awm ṭhin chu titawpa, hawihawm tak leh dik taka thawk theuh turin Mizofed-a thawk tute a chah. Mizofed Filling Station AOC, Lunglei hi kum 1981 a hawn niin petrol normal leh extra premium thla khatah litre 1,60,000 leh diesel thlak khatah litre 1,80,000 an hralh chhuah ṭhin.