MLP Act hlawhtlin nan kohhran, khawtlang leh NGO Thawhpuina kan mamawh dawn - Dr K Beichhua

Excise & Narcotics minister Dr K Beichhua chuan zu khapna dan Mizoram Liquor Prohibition (MLP) Act, 2019 a hlawhtlin theihna atan kohhran, tlawmngai pawl leh khawtlang thawhpuina an mamawh dawn thu a sawi.

Dr K Beichhua hian nimin khan Mizo Hnam Runah thu sawiin MLP Act hman ṭan a nih tawh thu a sawi a, "May 28 aṭang khan zu zawrh phal lohna state kan lo ni ta a, hemi chungchangah hian kohhran, tlawmngai pawl leh khawtlang thawhpuina kan mamawh dawn hle a ni. Ni 7.1.2019 khan Rangvamualah out post kan hawng thar a, khulai boruak pawh a ziaawm chho viauin kan hre ṭan a, kan lawm hle," a ti.

END Minister chuan Zokhaw­tharah in luah tur an zawng mek tih sawiin, "Zokhawtharah hian out post kan hawn thuai kan beisei. Bairabiah pawh hawn thuai kan tum. Sorkarah hnaruak 33 hnawhkhah phalna kan dil angin min phal sak a, hei hi a la tawk mai dawn lo a, kan tha tichak turin post tam tham tak leh hmanrua kan mamawhte kan dil belh leh mek," a ti a, an dilna hi a hlawhtlin ngei an beisei thu a sawi.

A department chan dang AH & Vety chungchang sawiin Dr K Beichhua chuan, "Sorkar hmasa hun laiin vawk natna PRRS a leng nasa hle a, Pathian zarah tun sorkar hian PRRS hi a la leng loa, kan lawm hle. Ram dang aṭanga ran lakluh khapna dan uluk taka kenkawh a ni a, YMA leh Home department pawhin min pui nasa hle a, kan lawm takzet a ni," a ti.

AH & Vety Minister chuan vawksaa kan intodelh theih nan nasa taka hmalak mek a nih thu sawiin, "Hmun hrang hrangah vawk vulhna siamin, tihchangtlun mek zel a ni. Ui â hri venna bakah ar, vawk leh ran pul hri venna pek mek zel an ni. Ran damlo enkawl dam 54,924 kan nei tawh," a ti a, a thlawna ran damlo entirna hun district tinah an buatsaih tawh thu a sawi.