Mizo hnamzia leh zonunmawi Chawi nun zel a pawimawh - Art & Culture Minister
Mizo Writers Association (MWA) member-te chu nimin khan Aizawl Press Club-ah an inhmukhawm a, khuallian Art & Culture minister R Lalzirliana chuan Mizo hnamzia leh zonunmawi chawi nun zel a pawimawh thu a sawi.
R Lalzirliana chuan Sap missionary kan rama an lo luh chinah ziak leh chhiar lamah nasa takin hma kan sawn tih sawiin, "Thu leh hla lamah rahbi thar kan kai phah a ni. Thu leh hla lama tui miten hla lungkuai tak tak an phuah te, hmanlaia kan pi leh puten hla an lo inhlanchhawn te ziaka dah a lo ni chho ta zel a ni. Mi tam takin kan hmuh phak loh ramdang chanchin te, finna leh khawvel thiamna hmanga an siam chanchin ngaihnawm tak takte kan
ṭawnga lehlin a ni zel hi a lawmawm hle a ni," a ti.
Hmasawnna lamtluang kan ramin a zawh zel lai hian kan mizo hnamzia leh zonunmawi kan chhawm nung zel hi a pawimawh tih sawiin Art & Culture Minister chuan, "Thu leh hla kan lehlin chungchangah pawh kan fimkhur a ṭul. Ṭhalaiten social media lamah Mizo ṭawng hman dan tur dik takin kan hmang lo nasa tawh," a ti a, ṭawng humhalhna kawngah hmalak a ngaih takzet thu a sawi.
Inkhawm hi MWA president R Lallianzuala'n kaihruaiin, MWA-in kum 2018 chhunga Mizo ṭawnga lehkhabu lehlin ṭha ber atana an thlan ‘Ilibagizia Left to tell-Pastor Murinzi’ letlingtu Thankima hnenah Art & Culture Minister hi Translation Book Award 2018 a hlan.
Mizo Writers Association hi kum 1977 khan din a ni a, tun dinhmunah hian member 70 vel an awm mek a ni. Kumtin Mizo subject-a ti tha tan Ch. Pasena Prize (HSLC), Lalmama Prize (HSSLC), R. Buchhawna Prize (B.A. Mizo Hons), J. Malsawma Prize (M.A. Mizo) an sem ṭhin.