Kum nga chhungin district changtlung tak Kan siam hman kan beisei - Dr Thangtea

South Tuipui bialtu MLA, minister Dr R Lalthangliana chuan Inrinni zing khan Hnahthial district tihpuitlinna tur atan Hnahthial khaw chhunga sorkar department hrang hrangte ram dinhmun a enfiah a, kum 5 chhungin Hnahthial, Saitual leh Khawzawl district chu changtlung tak an nih a beisei thu a sawi.

Dr R Lalthangliana chuan department hotute chu June 15, 2019 hmaa an dinhmun leh an mamawhte ziaka thehlut turin a ngen a, "Hnahthialah hian eng emaw hmel danglam kan hmuh ngei ka beisei. Hnahthial vanneihna em em chu department awmsa 80% te hi chu ti changtlungin ti lian dawn pawh ni ila an ram neihah hian an leng thei vek dawn," a ti.

Minister hrang hrangte hnenah an department enkawlah district tih puitlina tur atan ruahmanna siam  tura a ngen thu sawiin Dr Thangtea chuan, "Department hrang hrangte hian min bawhzui ṭhat sak avangin ka lawm hle," a ti a, Hnahthial DC Complex tur atan ruahmanna tih fel chiah a la awm lo na a, office leh in luah tur erawh a awm tawh nia a hriat thu a sawi.

District ti puitling turin building thar sak zawh vek kan nghah dawn chuan a rei deuh dawn tih sawiin Dr R Lalthangliana chuan, "Ṭhenkhatte chu office atan mimal in kan luah rih pawh a ngai dawn. Hnahthial, Saitual leh Khawzawl district-te hi tih puitlin ngei kan tum a, kum nga chhung hian district changtlung tak an nih kan beisei," a ti a, district tih puitlin a nih theihna atan mipuite ṭawiawmna a ngen.

Dr R Lalthangliana chuan Hnahthiala sorkar department hrang hrang awm mekte chu tlawh chhuak deuh vekin, district tih puitlinna tura district officer ṭhutna tur office leh quarter sakna tur hmun a awm leh awm loh a enfiah a ni.