Court-in la ngaihtuah lo

Gauhati High Court (GHC), Aizawl Bench-in The Mizoram (Selection of Candidates for Higher Technical Courses) Rules, 2016 chungchanga thutlukna a siam Mizoram sorkarin Supreme Court-ah a khin letna chu ngaihtuah a la ni lo.

Vanglaini palai zawhna chhangin Higher & Technical Education secretary Biaktluanga chuan GHC thutlukna an khinletna hi Supreme Court chuan an la ngaihtuah lo tih sawiin, "Court thutlukna khing let tur hian ṭan chhan kan nei ṭha tawkin kan in hria a, Law & Judicial department rawn chungin kan khing let ta a ni," a ti.

Tarlan tawh angin, The Mizoram (Selection of Candidates for Higher Technical Courses) Rules, 2016 ah hian Chakma-te chu category-II ah dah an ni a, hei hi duh loin  Mizoram Chakma Students' Union (MCSU) chuan High Court-ah hian an khing a ni. Court chuan tribal ṭheuh ṭheuh chu ang khata inen turin thutlukna a siam a; Court thutlukna ang chuan, Chakma-te chu category-I ah dah a ngai a ni.