Khawzawl Toursit Lodge leh PIDDC Lokayukta thupekin ACB-in an chhui dawn

Product Infrastructure Deve­lopment for Destination Circuit (PIDDC) scheme hnuaia Khawzawl Tourist Lodge sakna leh PIDDC scheme hmanga hnathawhnaah eirukna a awm leh awm loh chhui chiang turin Lokayukta chuan Anti Corruption Bureau (ACB) a hriattir.

Khawzawl Tourist Lodge sakna tur sum chungchangah hian PC Chuauhnuna, Khawzawl Darngawn Veng chuan May 24, 2019 khan Mizoram Lokayukta-ah a zualko a ni. PC Chuauhnuna'n tarlan danin, PIDDC scheme hmanga Khawzawl leh Mizoram hmun danga tourist lodge sak chu sum dawn a nih loh avanga tih tawp a nih hnuah he scheme buaipui a nih laia sorkarna chelhtu Congress chuan NEDP sum cheng nuai 304.08 hmangin hnathawh zawh lohte hi chhunzawm turin a ti a ni. Khawzawl Tourist Lodge bik chu cheng nuai 67.49 hmanga sak chhunzawm tura tih a ni a, mahse sak chhunzawm a ni lo.

Lokayukta chuan Mizoram Lokayukta Act, 2014-in thuneihna a pek angin PC Chuauhnuna thu thlen hi a enfiah a, chhui zui tlak a nih leh nih loh enchiang turin ACB chu a hriattir a ni. ACB-te hi ni 45 chhunga he thil hi chhui zui tlak a nih leh nih loh Lokayukta-a thlen leh tura tih an ni.