Ration chini sem dawn hnai

Food Civil Supply & Consumer Affairs (FCS&CA) department chuan ration chini an sem thei ṭep tawh a, chini hi Mizoram rawn phurh thlen a nih velah retailer-te sem tir nghal an ni ang.

Vanglaini palai zawhna chhangin FCS&CA secretary HL Rochungnunga chuan ration chini sem tur hian supply order an pek chhuah vek tawh thu a sawi a, "Election model code of conduct avangin min veh ve reng si a, supplier-te chu rawn phur lut hrih lo turin kan hriattir leh a ni. Tunah chuan election model code of conduct a awm tawh loa, supplier-te'n an rawn phurh thlen velah sem theih a ni ang," a ti.

Antyodaya Anna Yojana (AAY) chhungkuate hnena ration chini sem tur atan hian March 22, 2019 khan supply order tih chhuah a ni a, mahse election model code of conduct avangin FCS&CA dept. chuan an tum hunah an sem thei lo.