KHAWTHLIR
Thisen pe
June 1, Inrinni khan KṬP, Mission Veng Branch chuan Synod Hospital tan thisen unit 54 an pe a, a petute mipa 48 leh hmeichhia paruk an ni. Aizawl Civil Hospital tan ṬKP Aizawl Coordination, Aizawl East bialin unit 48 pein, petute mipa 43 leh hmeichhia panga an ni a; Mizo Chelsea Fans mipa 75 leh hmeichhia parukte'n unit 81 leh Salvation Army Youth-in unit 44 an pe bawk. Melriat Branch YMA member mipa 28 leh hmeichhia pathumte'n MIMER-ah unit 31 an pe a; KṬP, Thenzawl Bial member mipa 43 leh hmeichhia 16-te'n Serchhip District Hospital tan unit 59 an pe. Champhai Vengsang Branch YMA-in YMA Day pualin Champhai District Hospital tan mipa 34 leh hmeichhia parukte'n unit 40 an pe bawk.
I&PR Director
Information & Public Relations (I&PR) director David L Thangliana chu May 31, 2019 khan a pension tak avangin, vawiin aṭangin joint director ni lai Lallianpuii chuan I&PR director hna hi a chelh ṭan dawn a ni.
World Milk Day
College of Veterinary Sciences and Animal Husbandry, Selesih bultimin Inrinni khan Hermon Children’s Home, Durtlangah World Milk Day hman a ni. World Milk Day kum 2001 aṭang khan kumtin June 1-ah bawnghnute chu hriselna atana ṭhat zia leh bawnghnute tharchhuaktute mipui hriata phochhuahna atan hman ṭhin a ni a, kuminah hian thupui atan ‘Raise a glass’ tih hman a ni.
Building hawng
Cheng nuai 36.5 senga sak DLAO pisa building thar chu May 31 khan LAD director RS Lalzamliana'n a hawng a, building ṭha tak awm mah se a chhunga thawkte dawr an nawm si loh chuan awmzia a awm loh thu a sawi. Building hawn tak hi August 2017 aṭanga sak ṭan a ni a, a dung metre 15.3 leh a vang metre 8.10 a ni.
MLA-in enfiah
Lengteng bialtu MLA L Thangmawia chuan a bial chhung Kawlkulh leh a chhehvel khuaten an eng lakna ber 132 KV Sub-Station Khawzawl-Kawlkulh transmission line inkara harsatna a awm ṭhin vanga power an hmu ṭhat thei loh avangin, tun hnai khan a hmunah kalin a enfiah. L Thangmawia chuan ruahtui tlain line foul a siam ṭhin chu pumpelh a nih theihna atan theih tawp chhuah tur leh a rang thei ang bera jungle clearance nei turin Power & Electricity department hotute a ngen.