College thuam chakna tur atan RUSA 2-ah Mizoramin cheng vbc. 18.9 a dawng tawh

Ministry of Human Re­source Development (MHRD) in state sorkar hnuaia higher education institutions (college & university) te thuam chakna tura RUSA kal tlanga hma a laknaah Mizoram chuan cheng vbc. 18.9 a dawng tawh. RUSA 1-ah khan state matching share telin cheng vbc. 87.06 dawn a ni a, college 24 thuam ṭhatna atana hman a ni.

RUSA enkawltu Higher & Technical Education (H&TE) department hnuaia State Project Directorate (SPD) hotute hnen aṭanga Vanglaini thudawn danin, Mizoram chuan RUSA 2 hnuaiah hian college pali tan 1st instalment cheng vbc. 7.20 release a ni tawh a, state matching share cheng nuai 80 pawh tih fel a ni tawh. Cheng nuai 7.20 hnu hian college dang 13 tan 1st instalment-ah cheng vbc. 11.70 release leh a ni.

RUSA 2 hi kum 2018 aṭanga March 2020 thleng tur a ni. RUSA 2 phase 2-ah chuan NAAC accreditation valid nei college-te chauh tun dinhmunah chuan sum hmu tura approved theih a ni. RUSA 2 atan hian 'Upgradation of Existing Colleges to Model Degree College' atan Mamit, Hnahthial, Siaha leh J Thankima College-ten cheng vbc. 4 ṭheuh an dawng dawn. RUSA 2 hnuaiah tho hian college 13 ten Infrastructure Grants to Colleges Component hnuaiah cheng vbc. 2 ṭheuh an dawng dawn a ni.

RUSA Phase 1.0 (2014-2018) chhung khan cheng vbc. 87.06 (state share telin) dawn a ni a, college 24 thuam ṭhat a ni. SPD hotute chuan RUSA hnuaia ṭanpuina dawng tur hian college tinah Board of Governors (BoGs) din a nih thu sawiin, "Project Monitoring Unit (PMU) pawh principal-te chairman-na hnuaiah din a ni," a ti.

SPD hotute chuan college hotute leh YMA aiawhte nena pawisa hman dan enzui a nih avangin harsatna sawi tham a awm lo tih an sawi a, "Con­tractor-te sawiselna a awm zauh tih loh chu harsatna kan tawk lo," an ti a, construction firm pakhat chu VAT an pe ṭha lo tih hriat a nih avangin pek tir nghal an nih thu a sawi.

RUSA sum kal vel dan chu a fel fai thu sawiin SPD hotute chuan, "SPD-in pawisa lo thleng hi kan khawih ngai lo. Sum release reng reng hi April 2016 aṭang khan Public Finance Management System (PFMS) hmanga kalpui a ni. RUSA sum hi central-in state sorkar kutah a rawn dah a, state sorkarin state matching share nen State Higher Education Council (SHEC) RUSA account-ah a dah lut veleh a, SHEC account aṭang hian PFMS hmangin college account-ah thun leh a ni," an ti.

SHEC leh college account aṭanga sum chhuak reng reng hi PFMS hmanga tih vek a nih thu sawiin SPD hotute chuan, "Print Payment Advice (PPA) hmangin bank-ah kan dah leh a, bank hian PAP hmangin college-te Account-ah an dah lut leh a ni. Central-ah fund tracker hmangin project thlalak leh sum hman dan chipchiar upload ṭhin a ni," an ti a, RUSA sum hman Comptroller and Auditor General of India-in ṭum hnih an audit tawhah pawh thil serious tak an hmuh chhuah loh thu an sawi.