Exam system hman a ni leh dawn - Education Minister

May 31, Zirtawpni khan Lunglei Convention Centre-ah 'One Day Refresher Programme for Elementary Headmaster' buatsaih a ni a, khuallian School Education minister Lalchhandama Ralte chuan kumin aṭangin exam system hman a nih leh dawn thu a sawi.

Education Minister chuan zirna kan siam ṭhat loh chuan kan ram a dam thei dawn lo tih sawiin, "Kumin aṭangin kum khata ṭum thum exam neih ṭhin ang khan exam hi buatsaih leh a ni anga. hetah hian CCE-a internal mark khawl anga kha hman tho a ni. Hemi atana hriattirna hi tih chhuah tawh a ni a, exam calendar pawh siam a ni.  Zirna siamṭhat nan ngaihtuahna thar, system ṭha zawk kan neih a ngai," a ti.

Lunglei district chhungah zirtirtu aikal la 211 an awm thu sawiin Lalchhandama Ralte chuan, "Aikal la te hi dan bawhchhia, Pathian pawisawi an ni. Aikal late chungah headmaster, SDEO leh DEO-te an khawng a ngai a, 20 kan ban chuan thu an awih mai ang. Aikal lak chungchangah politics thila inchhan vak kan remti lo ang," a ti a, sorkar chuan kan ram a chhiat a hlauh thu a sawi.

Education Minister chuan headmaster kalkhawmte chu kan ramin engnge a mamawh tih ngaihtuah ṭhin turin a chah a, "Nu leh pa zah leh hmangaih te, aia upa zah te, tlawmngaihna leh hnam nunphung te naupangin an hriat a ngai. Zirtirtuten hengte hi naupangah tuh a ngai a ni," a ti.

Thusawitu dang Serlui bialtu MLA Lalrinsanga chuan headmaster-te chu fate kalna tlaka an sikul ṭheuh siam turin a sawm a, "Zirtirtuten an sikul chu an ramthar field a ni tih hriaa missionary rilru an put a ngai," a ti a, naupangte chu mahni inrintawkna neih tir tur leh mahni hma lam hun hmachhawn thei tura buatsaih an ngaih thu a sawi.

Intuaitharna hunah hian Education secretary Esther Lalruatkimi chuan headmaster-te mawhphurhna leh hriat tur hrang hrangte a sawi a ni.