Department leh loneitute vangin Vaimim tam tak chhanhim a ni

Agriculture department-a thawktute leh loneitute thawhrim vangin, fall armyworm-in vaimim a ei chhiat tur tam tak chhan hman a ni. Loneitute’n sum an hloh tur pawh a tira chhut aiin a tlem zawk tura ngaih a ni.

Vanglaini palai zawhna chhangin Agriculture department hotute chuan fall armyworm a puan tirhin vaimim a ei chhiat chak avangin hlauhthawnna a nasat thu an sawi a, “Nikum lama vaimim thar chhuah dante kan ngaihtuahin cheng vbc. 20 chuang vel loneitute’n an hloh tura chhut a ni. Mahse, fall armyworm control kawngah department leh loneitute’n theihtawp an chhuah hnuah hmun tam takah vaimimte a rawn ṭhang ṭha leh a ni,” an ti.

Agriculture department hotute chuan fall armyworm-in vaimim chinna hectare eng zat nge a tih chhiat tih leh loneitute sum hloh tur zat hriat theih a la nih loh thu sawiin, “Hmun tam tak, vaimim a thi hlen tura kan ngaihna hmunahte a rawn ṭha leh a ni. Kar tin report a rawn lut khawm zel a, report ṭha lam kan dawng zel a ni,” a ti a, report hnuhnung berah chuan fall armyworm chetna hi 5.56% in a tlak hniam tawh thu an sawi.

Hmun ṭhenkhatah chuan fall armyworm hi control ni tawh mah se, rawn inlar lehna hmunte pawh an neih thu sawiin Agriculture department hotute chuan, “Vaimimte an len tawh avang leh a hnahte a chan tawh avangin a hma ang chuan a eichhe thei tawh lo. Mahse, kan inthlahdah a thiang lo a, uluk taka ven reng a ngai. An inthlah pun chak avangin a vaia thah chimih chu thil harsa tak a ni a, theihtawp chhuah zui zel a ngai,” an ti.

Agriculture department hotute sawi danin, vaimimte an len tawh avangin insecticide hmanga kah phal a ni tawh lo. Insecticide hmanga kah a nih chuan fall armyworm eitu rannung dangte an thih phah a hlauhawm a ni. Tunah hian biological control system hmanga fall armyworm-te hi control tum a ni a, district hrang hrangah fall armyworm tihrem theihna atana rannung 

ṭangkai turte inthlahpung tura sem mek a ni.

Fall armyworm-in an vaimim a tih chhiat avanga loneitute chhawmdawlna pek tur chu sorkar laipui aṭang chuan hmuh a beisei awm loh. Hetihlai hian sorkar laipui chuan RKVY hnuaia Mizoramin pawisa a hmuh tur aṭangin, RKVY work plan tidanglamin fall armyworm dona atan pawisa a rawn pe chhuak a ni.