Assam police kut tuar journalist-te Barak Valley Division Commissioner hmaa inlan tura tih an ni

Assam sorkara Barak Valley Division commis-sioner pisaa special officer P Rongpipi chuan March 10, 2018-a Bairabi Zophaia Assam police-in kut an thlâkte chu June 17, 2019-ah Guwahati-a Barak Valley Division Commissioner hnenah inlan turin a hriattir.

Hemi chungchangah hian special officer P Rongpipi chuan June 1, 2019 khan Barak Valley Division Commissioner-a inlan tura tihte kohna lehkha a tichhuak a; Assam police-te’n râwng taka kut an thlak nia sawi Mizoram chanchinbumi a kohte chu chhuanlam siam loa Commissioner hnena inlan ngei turin a hriattir a ni.

June 17-a Barak Valley Division Commis-sioner-a inlan tura koh Mizo journalist-te chu - Zohmingmawia, Aizawl Post; Joseph Lalnuntluanga, ZONET Cable TV; C Lalthansangi, AIR, Aizawl; Embassy Lawbei, News 18; Zomuanpuia, Zingṭian (Kolasib); H Vanlalnghaka, Doordarshan Kendra leh, R Lalnunmawia, Duhlai (Kolasib)-te an ni.

Mizo chanchinbumite thil awmzia sawifiah tura koh an nih chhan chu, Assam Human Rights Commission-in May 28, 2019-ah hriattirna (AHRC case no. 2393/56/18019) a pek vang a ni a; Mizo journalist-te a koh rual hian, Clap Legal Service Institution, Cuttack, Odisha-a an president Dr Bikash Das chu koh a ni.

Zophaia Assam police-te’n Mizo journalist-te kut an thlak leh silai hial an hmeh puah chungchangah hian MJA Gen.Hqrs. chu Press Council of India, National Human Rights Commission, Prime Minister, DoNER Minister, Assam Chief Minister leh hmun dangahte an zualko a ni. March 13, 2018-ah Aizawl leh district khawpui tinah Assam police-te chet dan demin sit-in demonstration an huaihawt bawk.