Kolasib district-ah Excise & Narcotics department mi leh sa 31 an awm

Mizorama zu an lak luhna ber Assam state eptu Kolasib district-ah tun dinhmunah Excise & Narcotics Department (END) chuan duty tur mi 31 an nei.

Kolasib aṭanga Vanglaini thu dawn danin, Kolasib district-a END mi leh sa zinga officer pahnih leh enforcement mi 12 chuan Vairengte aṭanga zu leh ruihhlo lut tur an vêng a, officer panga leh mi dang 12-te'n Bairabi leh Serkhan lam aṭanga zu leh ruihhlo lo lut tur an veng thung. Hetih lai hian, END hian Kolasib district-ah Vairengteah chiah checkgate an nei a ni.

Vairengtea END mi duty tura awm officer pahnih te, mipa pasarih leh hmeichhia pathumte chu darkar 24 chhung duty a ngaih avangin a inchhâwkin an duty ṭhin a; Mizoram Liquor Prohibition (MLP) Act, 2019 hman a nih hnuah pawh Vairengteah END mi leh sa dah belh a la ni lo.

Kolasib END hian May 2019 chhung khan MLPC Act hnuaiah thubuai 23 an ziak lut a, chumi kaihhnawihah chuan mi 26 an man. May thla chhung vek hian Kolasib END-te hian NDPS Act hmangin thubuai 13 an ziak lut a, chumi kaihhnawihah chuan mi 16 an man. Kolasib-ah hian MLP Act hman a nih hnuah thubuai pariat ziah luh a ni tawh a, chu'ngte chu Kolasib khaw páwna man vek an ni.

Thu dawn danin, Kolasib-ah NGO-te'n hma an lak nasat avangin zu man tur a awm meuh lo. NGO-te'n zu siamna an tichhiat nasat avangin Assam ram lamah zu factory an siam nasa a, Assam aṭangin sap zu leh rakzu Mizoramah tawlh luh a ni.