Mizoram MP tlin ṭhin danin Hnam rilru a tina - Duhoma

ZPM leader Lalduhoma, MLA chuan, “Mizorama MP-te tlin ṭhin dan hi hnam rilru aṭanga thlirin thinlung a ná a, Mizote kan harh a ṭul tak meuh ta,” a ti.

ZPM pisaa inkhawmah thu sawiin Lalduhoma chuan, tun tuma MP inthlanah khan Tuichawng biala Chakma vote vang chauhin MNF candidate chu a tling a, MP inthlan hmasaah pawh hetiang tho hian he biala Chakma hnam hlawm vote hian kawngro a su tawh bawk niin a sawi. 

Mizote chu hnam anga inthlan hmachhawn an thiam a ṭul thu sawiin Duhoma chuan,  “India khua leh tui dik tak Chakmate hi kan haw lo a, kan do hek lo. Chutihlaiin CADC huam chhunga kum khata V/C thar 14 ngawt mai a piang theite hi pun dan pangngai a ni lo tih a lang reng. Illegal village-te hi sorkar hian ṭhiat nghal se tih kan phût a ni,” a ti.

MLA inthlanpui leh MP inthlanpui inkar ni 134 chhungin rorel lai MNF chu a hnung tawlh zawngin an kal tih sawiin Duhoma chuan, “Sorkar thar lawma an kut ben rî a la reh hma leh an thatho vanglai takin an minister leh MLA-te bial 11 tiamin bial 18 zetah an chak zo lo. Tuichawng bial tel lo phei chuan vote 3,329-in kan candidate-in a hmu tam zawk a ni,” a ti a, ZPM erawh chuan hma an sawn zel niin a sawi. 

ZPM Leader chuan, pawl hrang hrang thawkho an nih avangin harsatna tam tak an tâwk lo thei lo tih sawiin, “Tunah chuan mipuite min beiseina tipuitling turin party pakhatah kan insiam thei dawn ta. Mahni pawl ṭheuh dan leh hraite zawm kim a ngaih avang erawh chuan duh angin kan pên chak thei lo. A bo a bâng awm loin pakhatah kan insiam dawn a, party pakhata kan awm hunah chuan chak lehzualin ke kan pên tawh dawn a ni,” a ti.