Pawngsualtu kum 10 a tang dawn

Hmeichhia kum 14 mi pawngsualtu Vanlalvena, Khualen khua-a awm ṭhin chu Champhai Special Court-a judge R Vanlalena chuan kum 10 chhung jail tang tur leh Rs. 5,000/- chawi turin a hrem.

Hmeichhia pawngsual a nih hun hi September, 2016 vel a ni a, mahse hriat chhuah a nih hun chu March, 2017 a ni. He hmeichhe tleirawl hian a chunga thil thleng hi vau a nih avangin a sawi chhuak ngam lo a, mahse nau a pai tak avangin a doctor hnenah pawngsual a nih thu hi a puang a ni.

An fanuin pawngsual a tawk tih an hriat veleh hmeichhe chhungte hi Champhai-a Child Welfare Committee (CWC) Chairman hnenah kalin, thil awm dan an hrilh nghal a ni. CWC Chairman hian Khawzawl Police Station-ah FIR a thehlut a, anni hian an chhui zui nghal a ni.

Police-in an thil hmuh chhuahte Court-a an thehluh hnuah finfiahna leh thuhretute thusawi aṭangin Court chuan Vanlalvena chungah he thutlukna hi siamin a hrem ta a ni.