KHAWTHLIR

Road Safety Week, 2019 hman a nih chhunga Lunglei district-a driver dan bawhchia man pualin nimin khan Lunglei DTO leh Lunglei Traffic Police ṭangkawp chuan Tukluih Training (One Day Mandatory Counselling & Training & for Offending Drivers) an buatsaih a, lirthei khalhtute hriattur pawimawh hrang hrang hrilh hriat an ni. Road Safety Week chhungin Lunglei district-ah hian dan bawhchhia mi 134 man an ni.

MZP Hqrs., Kolasib chuan nimin khan St. Joseph Parish Hall-ah an district chhunga Mizo zirlai ti ṭhate chawimawina hun an buatsaih a, khuallian bialtu MLA K Lalrinliana chuan ram leh hnam intodelhna kawngah zirlai hman ṭangkai a pawimawh thu sawiin, “Intodelhna rilru puin thil chi hrang hrang deh chhuah/thar chhuah na kawngah hma kan sawn a hun a ni,” a ti.

Lai Autonomous District Council (LADC) hnuaia Lungtian MDC constituency leh Chakma Autonomous District Council (CADC) hnuaia Ugudasury South MDC constituency-a June 6, 2019-a by-election neih tura inthlanna buaipuitu tur polling officer leh assistant polling officer-te pualin nimin khan Lawngtlai DC conference hall-ah training thawh hnihna leh a hnuhnung ber tur buatsaih a ni.

Coordination Committee on Traffic Management meeting, April 25, 2019-a neihin a rèl anga Aizawl khawpuia lirthei intlân chhâwk (indin chhâwk) dan thar chu June 1, 2019 aṭanga hman ṭan tur ni mah se, Gauhati High Court, Aizawl Bench-in kalpui rih loh tura a tih avangin hman theih a ni rih lo. Hei vang hian Mizoram sorkar chuan, intlan chhâwk dan thar chu June 6, 2019 thleng hman rih loh tur a nih thu leh, intlan chhâwk mek dan anga kal zel rih tur a nih thu, thuchhuah siamin a tarlang.