MIZOFED petrol pump darkar 24 hawn a ni

Treasury Square, Aizawla Mizoram State Cooperative Marketing & Consumers’ Federation (MIZOFED) Ltd.  Petrol Pump chu darkar 24 chhunga dawr theih turin nimin zing khan Cooperation minister C Lalrinsanga'n a hawng a, nimin aṭang khan darkar 24 hawn nghal a ni.

Cooperation Minister chuan MIZOFED a thawktute ṭan lakna leh inpekna zara an petrol pump mipuite dawr theih tura darkar 24 hawn a ni ta chu lawmawm a tih thu sawiin, "Rikrum thil leh mamawh thut thilah mipuite mamawhna phuhru tura hetianga ruahmanna awm hi mipui leh ram rawngbawl duhna tak tak thinlung neitute vang a ni," a ti a, petrol pump hi mipuiin an biak pawh reng theihna atan toll free telephone pawh dah thuai tum a nih thu a sawi.

Kan petrol leh diesel-te a thianghlim tur a nih thu sawiin C Lalrinsanga chuan, "Petrol leh diesel a ṭhat tawk loh hian lirthei neitute economy thlengin a nghawng.  Petrol leh diesel thianghlim kan dawn theih ngei nan mipuite pawhin kan bengvar kan chhuah ve fo a ngai. Legal Metrology lam pawhin petrol leh diesel thianghlim kan hman theihna turin theih tawp chhuah zel se, a ṭha thei ang berin endik ṭhin se ka duh a ni," a ti a, petrol pump-a thawktute chu petrol leh diesel-te teh tling ngei mipuite hnenah pe ṭhin turin a chah. 

MIZOFED Ltd. hi State level Cooperative Society leh State Government Agency a ni a, kum 1981 ah din a ni. Aizawla petrol pump hi December 9, 1981 aṭangin an enkawl. Petrol pump hi Pathianni bikah chuan chhun dar 12 aṭanga tlai dar 3 thleng hawn a ni ang a, a bak zawngah chuan dar 24 hawn tur a ni.