MHTC Principal thlalak hâl a ni

Aizawl City College Joint Students’ Union, DIET Trainees Union, Women’s Polytechnic, Aizawl Student Union leh Mizoram Hindi Training College Adhoc Trainees Union-te chuan nimin khan Mizoram Hindi Training College (MHTC) prin­cipal Dr Louis Hauhnar thil tih dan an duh loh avangin Dr Louis Hauhnar thlalak an hâl. 

Pawl palite chuan thuchhuah inṭawm an siam a; Dr Louis Hauhnar chuan a thuneihna a hmangsual tih tarlangin, "Zir­laite'n MHTC Principal chêt dan dik lo tak leh eirukna tam tak thlenga kan tarlang tawh chunga a chunga action lak a la ni lo hi kan hrethiam lo hle. Zirlaite chunga ṭawngkam bawlhhlawh tak tak hmang duhtu, zirlaite hmakhua tihchhiat veka vau duhtu, zirlaite rilru hliamtu hi transfer vat kan phût a ni," an ti.

Tuna MHTC-a zirlai ni mek leh second year zir turte pawhin principal ni mek chu an duh tawh loh thu tarlangin pawl palite chuan, "Mizoramin Hindi Training College ṭha tak a neih zel theih nan leh zirnaah quality ṭha zawk a awm theih nan principal hi transfer a nih hma loh chu kan hmalakna hi tawpsan kan tum lo," an ti a; an thil duh tihpuitlina a awm lo a nih chuan a aia na zawkin an chet zel tur thu an tarlang. Pawl palite chuan, RTI Act hmanga zawhna an siam pawh MHTC Principal-in dik lo takin a chhang tih an tarlang a, RTI Act hmanga zawhna chhannate pawh nimin khan an hâl tel a ni.