Main trunk line-ah kawng chhâwng Tih vek kan tum - Chief Minister

Nimin Assembly session-ah chief minister Zoramthanga chuan, main trunk line-ah kawng chhâwng (elevated road) tih vek tum a nih thu a sawi a, "Vawi leh khata tih theih erawh a ni lo," a ti.

MNF member Dr Vanlal­ṭanpuia zawhna chhangin Chief Minister chuan, Guwahati-a mi ang kawng chhâwng siam tumin theihtawpa hma an lâk thu a sawi a, "Flyover pawh awm dawn mah se, a main trunk line-ah chuan elevated road tih vek kan tum. Delhi-ah pawh thui pui pui a awm a, ram dangah pawh. Assam-ah pawh thui tak an ti. Kan ti ve thei ngei ang tiin kan en," a ti a; Covid-19 avanga Delhi-ah pawh zin mumal theih a la nih loh avangin thil tih a la harsat thu a sawi.

Zoramthanga chuan, Vaivakawn leh Bawngkawna flyover siam tura harsatna awm sawiin, "Vaivakawn hi a ring a rêk lutuk a, a ban phunna pawh a buaithlak. Field chhak lam tàwp aṭangin ban phun chho ila, in awm mek nena inkarah ft. 40 vel a kal chho thei a, chu chu tuna kawng bula in neite hian nei mai se, in surrender ve thung se tih ngaihtuah a ni. Chutiang chuan Smart City aṭangtein a tih theih em em tih ngaihtuah a ni. A ring rêk lai zau taka siam dan ngaihtuah a ni a, project a kal mek," a ti.

Bawngkawnah kawng chhâwng siam dan tur an zawn mek thu sawiin CM Zorama chuan, "Bazar chhuk thlâkna lam chu a zau a, a piah lam rêk laiah ban phunna kawng páwnah ni thei se an duh," a ti a; kawng a zau tâwk lo chu flyover an siam zung zung theih loh chhan a nih thu a sawi. 

Hetih lai hian, INC member Zodintluanga leh ZPM member Lalchhuanthanga te zawhna inṭâwm chhángin Chief Minis­ter chuan, Bawngkawn leh Vaivakawna flyover siam turin feasibility study & preparation of DPR tih mek a nih thu a tarlang a, "DPR hi March 2021-ah chuan peih hman beisei a ni. DPR siam zawh a nih hma chuan a senso zat tur a hriat loh. Flyover siamna atan hian tunah rih chuan sum dah a la ni lo. A hnathawktu tur pawh a la hriat loh," a ti.

Dr Vanlalṭanpuia'n PMGSY hnuaiah tender 5% leh 6%-a hniamtea an chhàn thu a sawi chungchangah Zoramthanga chuan, "Hei tak hi PMGSY-a kan buaina, 5% - 6% chu nêp tak a ni. Tender chhuah a ni a, 20%, 25% below ten an chháng a, vawi khat chu 50% below a awm an ti. Pe ta ila engmah mah a chhuak dawn lo a, pe lo ila a chháng hniam ber pek tur a nih avangin Court-ah an kal leh si. Pekin a tumbungah an ti  leh thei ṭhin si lo," a ti a; an kalphung thlak turin PMGSY khawihtute nen pawh an innawr nasat thu a sawi.