COVID-19: Mizoram dinhmun Hripui vei mi 1 hmuh belh a ni
March 2, Thawhlehni khan Mizoramah Covid-19 vei mi pakhat hmuh chhuah a ni a, tualchhunga kái a ni. Niminah hripui laka fihlîm tawh chhuahtir an awm lo.
Thawhlehnia Covid-19 vei hmuh thar chu RAT hmanga Aizawla hmuh chhuah a ni a; Chhinga Venga mipa kum 35 mi, private hospital-a inentir tura a kalnaa hmuh chhuah niin, hri a kaina hriat a ni lo a, symptom nei a ni.
Mizoramah Covid-19 vei mi 4,427 hmuh chhuah a ni tawh a, mipa 3,230 leh hmeichhia 1,197 an ni. Nimin tlai dar 5 thleng khan mi 4,398 (99.34%) chhuahtir an ni tawh a, mi 10 (0.23%) thi tawhin, enkawl mek mi 19 (0.43%) an awm.
March 2, Thawhlehni khan ZMC laboratory-ah RT-PCR hmangin swab sample 112 endik a ni a, TrueNAT-PCR hmangin Mamit leh Lawngtlai district-ah sample 25 leh RAT hmangin district 10-ah sample 1,301 endik a ni bawk. Thawhlehnia sample endik zat chu 1,438 a ni a, chu'ng aṭanga Covid-19 positive hmuh chhuah pakhat chu 0.09% a ni.
Mizorama district 11 zinga paruk Siaha, Kolasib, Serchhip, Lawngtlai, Khawzawl leh Hnahthial district-ahte Covid-19 vei an awm tawh rih lo.
March 2, 2021 thlenga Mizorama swab sample endik tawh zat chu 2,34,742 a ni a, chu'ng aṭanga Covid-19 positive mi 4,427 chu 1.89% a ni. Hripui vei hmuh tawh zinga mi 2,112 chu Mizoram chhunga kái chhâwng an ni a, mi 2,315 chu Mizoram páwn aṭanga an rawn luh hnua hmuh chhuah an ni thung.