KHAWTHLIR

Nimin Assembly session-ah Finance changtu chief minister Zoramthanga put luh, 'The Mizoram Appropriation (Supple­mentary Demand for Grants, 2020-2021) Bill, 2021 pawm a ni a; Law & Judicial minister TJ Lalnuntluanga put luh 'The Mizoram Civil Courts (Amendment) Bill, 2021' pawm a ni bawk.

Siaha DC pisa chuan nimin khan DRDA conference hall-ah Entrepreneurial Development Programme an buatsaih a, bawrhsap Kesavan R-a'n a hmanpui. Inkhawm hi IPRO N Vabeiratlua'n a kaihruai a, DLEO  Reuben T Kompa, Entrepreneurial Development nodal officer ni bawkin entrepreneurship chungchanga thil pawimawhte a sawifiah.

ZPM member Dr Vanlalthlana zawhna chhangin Transport minister TJ Lalnuntluanga chuan danin a phut angin indaih lohna nasa tak karah garage endik hna kalpui zel a nih thu House a hrilh a, "Felfai taka garage endik a nih zel theihna atan thawktute pawh kan infuih thar  zel. Garage nei lote chu register lo turin kan inhrilh a ni," a ti.

State Referral Hospital-ah Covid-19 vei mi 12 enkawl mek an ni. SRH-ZMC Bulletin tarlan danin, ICU-a enkawl reng tawh mi pahnih chu swab sample endik nawnnaah an negative tawh avangin Extension ICU-ah sawn an ni. Extension ICU-ah mi pathum awmin, pakhat chu ventilator hmanga enkawl a ni a, pahnih dang pawh oxygen pek mek an ni. Isolation-a awmte'n harsatna lian tham an nei lo. 

Art & Culture department director hlui leh Mizo chungchang lehkhabua ziak ṭhintu C Laitanga (84) h/o Vanmawii, Hunthar Veng, Aizawl chu nimin chawhnu dar 3:15 khan a thi a, vawiin chawhma dar 11-ah vui a ni ang. C Laitanga hian lehkhabu a tichhuak nual tawh a, chung zingah chuan 'Know your own land, Mizoram' tih te, 'A brief account of Riangs in Mizoram' tihte a tel.